“Sisakan” dəstəsinin döyüşçüsü Aşor Avaqyan bildirdib ki, ermənilər Azərbaycan sərhədinə ordu yığır. 

O, həmçinin qeyd edib ki, sərhəddəki qüvvələr ən yüksək döyüş hazırlığı vəziyyətinə gətirilib:

“Gərginlik əsasən Laçın, Kəlbəcər və Naxçıvan istiqamətindədir. Xəritəyə baxsanız görərsiniz ki, Naxçıvan sərhədində “ciblər” doludur və Laçından Bazarçaya, Cermuka qədər düşmənin də həmin ərazilərdə cəmləşməsi müşahidə edilir”,- deyə erməni mediası yazır.

Son vəziyyəti Ednews-a şərh edən politoloq Tural İsmayılov bildirib ki, Ermənistan hazırda bölgədə gərginlik görüntüsü yaratmaqda maraqlıdır: 

“Son dövrlər sərhədlərə qoşun birləşmələrinin cəlbi Ermənistanın sülh prosesində əsla maraqlı olmadığını göstərir. Vəziyyət aydındır. Xarici güc faktorları bölgəni sabotaj etmək üçün Ermənistandan kukla kimi istifadə edir. Ermənistan ümumiyyətlə, sülh danışıqları olan zaman Azərbaycanın əleyhinə müxtəlif təxribatlar törədib. Bundan öncə Brüssel və Vaşinqton görüşlərində də Ermənistan bu təxribatlarına əl atdı. Yenə görürük ki, Ermənistan tərəfindən ölkəmizə qarşı çirkin hücumlar həyata keçirilir. Sərhədlərin delimitasiyası ilə bağlı işlərə start verilərsə, Ermənistan mina və digər humanitar problemlərin və böhranların həlli üçün səmimi niyyət ortaya qoyarsa, sülh müqaviləsi istiqamətində vacib bir addım hesab edilə bilər”.

Politoloq vurğulayıb ki, son dövrlər Paşinyanın sülh ilə bağlı verdiyi açıqlamalar daha çox Qərbə yönəlib. O, Qərbə Ermənistanın guya sülhə hazır olması haqqında görüntü verir və həmçinin problemin həll edilməməyində birbaşa olaraq, Moskvanı günahlandırır.

Tural İsmayılovun fikrincə, bütün bunlar Paşinyanın növbəti manevr cəhdlərindən biridir.

“Azərbaycan və Ermənistan arasında artıq real sülhdən başqa heç bir şans qalmayıb. Prezident İlham Əliyev Ermənistana sülh üçün son şansı bu il müəyyənləşdirib. Artıq Ermənistan ağlını başına yığaraq, bu prosesdə mütləq və konkret addımlar atmalı olduğunun fərqinə varmalıdır”.

Oğuz