Rusiya Dövlət Dumasının sədr müavini Pyotr Tolstoy Azərbaycana qarşı təxribatçı fikirlər səsləndirib.
Belə ki, Dumanın sədr müavini bildirib ki, Rusiya aparıcı dünya dövləti mövqeyinə malikdir, əvvəllər onun tərkibində olan ölkələr ondan asılı idi və bundan sonra da belə olacaq. Onun fikrincə, Azərbaycan, Ermənistan və Ukrayna üçün Rusiyadan başqa istiqamət yoxdur. O deyib ki, Rusiya olmadan nə Ermənistan, nə Azərbaycan, nə də Ukrayna mövcud olacaq.
Görünür keçmiş məşhur tele-jurnalist, efir verlişləri ilə parlamenti tamamilə səhv salıb...
Bu fikirlər Vahid Rusiya partiyasının siyasi xəttinə zidd olmaqla savayı, mövcud Beynəlxalq Münasibətlər aləmində siyasi və geosiyasi proseslərlə uyğunlaşmayan, orta əsrdən qalma ekspansionist bir təfəkkürdür. Müasir günümüzdə Beynəlxalq Münasibətlər bütün müstəqil ölkələrin bir-biri ilə əməkdaşlıq etdiyi və iqtisadi cəhətdən aslı olduqları bir şəraitdə aparılır. Günümüzdə işğalçı siyasət aparmağın ziyanları, xeyirlərindən daha çoxdur. Rusiyanın 2022 – ci ildə Ukraynanı işğala başlaması buna sübutdur və sözsüz ki, dünya ölkələri ilə birlikdə ən əsas da post-sovet ölkələrini narahat edən bir məqam oldu. Lakin indiki çətin vəziyyətə nəzər yetirsək, hazırda Rusiyanın özü belə Azərbaycan kimi digər post-sovet ölkələrinin müttəfiqliyinə və dəstəyinə ehtiyac duyur.
Hələ 2022-ci ilin fevralın 27-də Rusiya ilə Azərbaycan arasında birgə müttəfiqlik fəaliyyəti haqqında Moskva bəyannaməsi qəbul edilib. Adicə elə bu müqavilənin özü belə bu fikri tam əsaslandırır və cənab Tolstoyun fikirlərinin nə qədər yanlış olduğunu göstərir. Bu cür fikirlər hər iki ölkənin münasibətlərinə çox böyük bir zərbə vura bilər. Həmçinin bu söylənilən fikirlər, ilk öncə Rusiya Federasiyası hökümətinə hörmətsizlik və parlament sədr müavini statusu daşıyan bir şəxsə yaraşmayacaq sözlərdir. Ona görə də, Rusiyanın rəsmi dairələri qısa bir zamanda hakim partiyanı təmsil edən vitse-spiker postunda olan Tolstoyun fikirlərinə aydınlıq gətirməli və təkzib etməlidir.
Qeyd edək ki, Pyotr Tolstoy dahi Rus yazıçısı Lev Tolstoyun ulu nəvəsidir. Görünür Pyotr Tolstoy ulu babası Lev Tolstoy şəcərəsinin davamçısı olduğunu unudaraq, hələ də imperialist düşüncələrdə yaşayır.
Əkbər Şəbəndəyev