Azərbaycan Dövlət Sərhəd Xidmətinin sentyabrın 27-də verdiyi məlumata əsasən, Qondarma Qarabağ Respublikasının “dövlət naziri” vəzifəsində çalışmış Ruben Vardanyan “Laçın” dövlət sərhədindən buraxılış məntəqəsində saxlanılıb.
Məlumatda deyilir ki, 1968-ci il təvəllüdlü Vardanyan Dövlət Sərhəd Xidmətinin Çevik Hərəkət Qüvvələri əməkdaşlarının müşayiəti ilə Bakıya gətirilib.
Məsələ ilə bağlı Ednews-a danışan Beynəlxalq Avrasiya Mətbuat Fondunun prezidenti Umud Mirzəyev Vardanyanın gec-tez həbs olunacağına heç bir şübhəsinin olmadığını deyib. Onun sözlərinə görə, Qarabağda xaos yaratmağa çalışan, təxribatlarından əl çəkməyən Vardanyanın həbsi, üstəlik Bakıya gətirilməsi olduqca mühüm hadisədir:
“Çünki o, son illərin ən təhlükəli separatçılarından biri kimi ortalığa çıxmışdı. Vardanyanın 5-3 qəpiyi onu havalandırırdı. Atalar yaxşı deyib: "Su səhəngi su yolunda sınar". Vardanyan və onun kimilər Azərbaycan ərazisində qeyri-qanuni məskunlaşmış, təxribatçılıqla məşğul olurdular. Bu Azərbaycanın Konstitusiyasına zidd, beynəlxalq hüquq normalarını isə pozmaq demək idi.
Vardanyan təhsilini Avropada və ABŞ-da bitirib. 90-cı illərdən bəri maliyyə, bank işi, müxtəlif iqtisadi layihələrdə fəaliyyət göstərib. O, bu illərdə siyasət barədə düşünməyib. Vardanyan siyasətçi olmadığı qədər, hərbçi də deyil. Buna baxmayaraq, böyük şirkətləri və milyardları idarə edən Vardanyan Qarabağa köçməyə razılaşıb. Buradan aydın görünür ki, Vardanyan birbaşa Rusiyada fəaliyyət göstərən erməni lobbisi, diasporası tərəfindən idarə olunurdu”.
Söhbət əsnasında U.Mirzəyev həmçinin Moskavda erməni diasporunun keçmiş rəhbəri Levon Ayrapetyanın Qarabağın işğalı üçün 150 milyon dollar büdcə ayırmasını da xatırladıb.
“Sonradan onu Moskvada həbs etdilər. Qondarma erməni soyqırımı"nın tanınması üzrə xaricdə önəmli simalardan biri kimi tanınan Ayrapetyanın "Kingiseppski" mütəşəkkil cinayətkar qrup ilə əlaqədə olduğu ortaya çıxmışdı. Ümumiyyətlə, Paris, London, ABŞ-da erməni diasporalarının mənfur separatçıları Azərbaycana qarşı təxribatçılıqlarını uzun müddət davam etdiriblər. Onlardan ad da çəkə bilərəm: Zareh Sinanyan, Ara Abrahamyan və digərləri”.
Sonda Umud Mirzəyev qeyd edib ki, azərbaycanlılara qarşı cinayət törədənlərin hamısını Ruben Vardanyanın aqibəti gözləyir.
“Ədalət hər zaman öz yerini tapır. Sadəcə olaraq bunun zamanı gec də ola bilər, tez də. 30 ildə əli azərbaycanlıların qanına batan canilər layiqli cavablarını alacaqlar. Xocalıda, Ağdabandda, Meşəli və digər ərazilərimizdə insanlarımızı işgəncə ilə öldürən hər kəs bunu bilməlidir, bir gün cavab vermək sırası onlara da çatacaq”.
Qeyd edək ki, 29 iyul 2023-ci il tarixində Meşəli soyqırımı hadisələri ilə bağlı beynəlxalq axtarışda olan şəxslərdən biri Vaqif Xaçaturyan da Laçın sərhəd-keçid məntəqəsində saxlanılıb.
Oğuz
