Prezident İlham Əliyev bu gün İspaniyanın Qranada şəhərində Avropa Birliyi, Fransa və Almaniya liderlərinin iştirakı ilə Ermənistanın baş naziri Nikol Paşinyanla görüşdən imtina edib.
Buna səbəb kimi Fransanın destruktiv mövqeyi, eləcə də Paris və Berlinin Türkiyənin toplantıda iştirakı ilə bağlı fikir ayrılığıdır. Həmçinin Rusiya Xarici İşlər Nazirliyinin mətbuat xidmətinin rəhbəri Mariya Zaxarova da bu məsələyə münasibət bildirib. O, qeyd edib ki, Azərbaycanın Qranadadakı görüşdən imtina etməsi onun suveren hüququdur.
Məsələ ilə bağlı Ednews-a danışan millət vəkili Hikmət Babaoğlu Ermənistanın və onun hamilərinin Azərbaycana qarşı yeni bir “yalnızlaşdırma” siyasəti həyata keçirməyə cəhd etdiklərini deyib. Onun sözlərinə görə, burada bir məqsəd var -Azərbaycan təklənsin və onun üzərində təzyiq qurmaqla Ermənistanın lehinə hansısa şərtlər formalaşdırılsın.
“Belə olan halda Azərbaycan tam müstəqil dövlət kimi öz suveren iradəsinin üzərində heç bir təzyiqi tanımayacaq. Fransanın, Almaniyanın, Aİ-nin Qranada görüşündən əvvəlki davranışları xüsusən Aİ-nin sədri Rusiyanın Qarabağda yaşayan erməniləri satmaqla bağlı açıqladığı mövqeyi, eyni zamanda görüş ərəfəsində Fransa XİN-nin Ermənistana səfər etməsi və Azərbaycan əleyhinə mövqe sərgiləməsi, bundan başqa Ermənistanı silahlandıracağı ilə bağlı fikirlər səsləndirməsi və üstəlik qonşu ölkənin ərazisində yerləşən Ağrı Dağını Ermənistan kimi öz sosial hesabında paylaşması sülhə xidmət etmir. Şübhəsiz ki, belə olan halda məhz bu dövlətlərin təmsilçiləri ilə bir arada sülhü müzakirə etmək mümkünsüz idi”.
H.Babaoğlu qeyd etdi ki, çünki onların əhval-ruhiyyəsi sülhə deyil, müharibə ritorikasına söykənir:
“Necə ola bilər ki, Fransa XİN-i Qranada görüşündən 2 gün əvvəl Ermənistana səfər edir və deyir ki, biz Ermənistanı silahlandıracağıq? Ona görə də Azərbaycan bu görüşə getməkdən haqlı olaraq imtina etdi. Qərbin yeni trendi olan Azərbaycanı “yalnızlaşdırma” siyasətini ölkəmiz qəbul etmədi və üstəlik Azərbaycan müttəfiqinin də, qardaş Türkiyənin də bu görüşdə iştirak etməməsindən əlaqədar irəli sürdüyü tələblərin qəbul olunmadığını gördü. Aydın oldu ki, Qərb ölkələrinin iradəsi və diqqəti sülhdən daha çox Azərbaycan üzərinə təzyiq qurmağa yönələcək. Azərbaycan güclü, qalib dövlətdir. Sülh təşəbbüsü ilə çıxış edən ölkədir. Harda real sülhün danışılacağı platforma olacaqsa, Azərbaycan o görüşə gedəcək”.
Oğuz
