“Ermənistan Tbilisinin 2004-2012-ci illər yolunu təkrarlayaraq Cənubi Qafqazda yeni Gürcüstana çevrilməyə can atmamalıdır. Ermənistan anlamalıdır ki, region ölkələri artıq Qərb ölkələrini bu regionda görmək istəmir”.
Ednews “mirrorspectator”a istinadən xəbər verir ki, bu sözləri erməni siyasi ekspert Dr. Benyamin Poqosyan söyləyib. Onun fikirlərinə görə 44 günlük müharibəsindən etibarən Ermənistan, xarici siyasətində çoxşaxəli siyasətə keçsə də, bu ona xeyirdən çox ziyan verib.
“2020-ci ildə baş vermiş Qarabağ müharibəsindən bəri şaxələndirmə siyasəti Ermənistanın xarici siyasətinin gələcəyi ilə bağlı müzakirələrdə yəqin ki, ən çox istifadə olunan termin olub. Baş verən müharibə regionda Azərbaycan və Türkiyənin gücünü artırdığı üçün Rusiya narahatdır, prosesdə Ermənistanı günahkar olaraq görür. Bu səbəbdən dolayı olaraq da Ermənistan Rusiya ilə əməkdaşlığını yavaş-yavaş kəsərək Qərbə üz döndərməyə başladı. Rusiya Qərbin Ermənistan üzərində hökmranlığının qarşısını almaq üçün hər şeyi edəcək və qeyd edim ki, Kremlin Ermənistana təzyiq etmək üçün geniş imkanları var. O, Rusiya qazının qiymətindən tutmuş, Ermənistanın ümumi ixracının 40 faizə qədərinin təyinatı olan Ermənistan biznesinin Rusiyaya çatmasına maneələr yaratmaqla bir çox iqtisadi rıçaqlardan istifadə edə bilər”.
Ekspert əlavə edib ki, Ermənistanın regionda Qərbin “raket meydançası” kimi görülməsi ehtimalından olduqca ehtiyatlı davranmalıdır:
“İran və Rusiya Cənubi Qafqaz üçün regional formatın (3+3 və ya 3+2) yaradılmasını dəstəkləyir, regional problemlərin ilk növbədə regional güclər tərəfindən həll edilməsi fikrini dövriyyəyə buraxır. Azərbaycan və Türkiyə bu ideyanı 2020-ci il Qarabağ müharibəsi başa çatdıqdan dərhal sonra irəli sürüb, Türkiyə isə 2008-ci ildə Rusiya-Gürcüstan müharibəsindən sonra oxşar ideya ilə çıxış edib. Ermənistanın özünü Qərbin “raket meyançası” kimi göstərməsi Rusiya, İran və Türkiyə üçün mənfi tərəfdən qarşılanılacaq.
Soyuq Müharibədən sonrakı dünya nizamı zəiflədiyindən və yeni nizam hələ yaranmadığından dünya durğunluq dönəminə qədəm qoyub. Növbəti onilliklər təlatümlər, münaqişələr və qeyri – formal ittifaqların yaradılması ilə dolu olacaq. Hazırkı vəziyyətdə Ermənistan özünü avtoritarizmə və ya demokratiyaya qarşı növbəti döyüşçü kimi qələmə verərək Rusiya-ABŞ müharibəsinin ortasına atılmaqda ehtiyatlı olmalıdır. Yəni Ermənistan Tbilisinin 2004-2012-ci illər yolunu təkrarlayaraq Cənubi Qafqazda yeni Gürcüstana çevrilməyə can atmamalıdır. 2022-2023-cü illərdə Gürcüstanın nümunəsinə baxmaq daha ağıllı olar”, - deyə sonda ekspert qeyd edib.
Əkbər Novruz
