Türkiyə xarici işlər naziri Hakan Fidan Bakıya səfər edib. Səfər çərçivəsində Prezident İlham Əliyev və XİN rəhbəri Ceyhun Bayramovla görüşüb. Rəsmi Bakının önəmli proseslərə imza atdığı vaxtda bu səfərin reallaşması isə diqqət çəkir. 
Görüşlə bağlı politoloq Qabil Hüseynli Ednews-a açıqlamasında bildirib ki, Türkiyə xarici işlər naziri Hakan Fidanın Azərbaycana gəlişi birbaşa Azərbaycan-Ermənistan arasında sülh müqaviləsinin bağlanması ilə bağlıdır.
"Türkiyə tərəfləri sülh sazişinin imzalanması yönündə bir növ tələsdirir. Türkiyə Ermənistanla sərhədləri açmaq, əlaqələri bərpa etmək niyyətindədir. Ermənistan tərəfi də bu məsələni son günlər davamlı gündəmə gətirməkdədir. Erməni rəsmilər Türkiyə ilə sərhədlərin açılmasından danışırlar. Təbii ki, bu məsələlər Azərbaycan və Türkiyə rəhbərliyi, o cümlədən rəsmilər arasında müzakirə olunur və məsləhətləşməli şəkildə ortaq addımlar atılır. Yəni Bakı və Ankara saatlarını eyni vaxta qururlar". 
Politoloq qeyd etdi ki, sülhyaratma prosesinin gedişində iki qardaş ölkənin bir-biri ilə mütəmadi məsləhətləşməsi önəmli olmaqla yanaşı, həm də ənənə halını alıb:
"Türkiyə rəsmiləri Azərbaycana ardıcıl səfərlərlə sülh prosesi ilə bağlı ilk mənbədən dəqiq və ətraflı məlumatlar alırlar. Ankara bu istiqamətdə çox ciddi səy göstərir. Güman edirəm ki, Hakan Fidanın səfəri də prosesə töhfə verəcək. İrəvan-Bakı arasında əldə olunacaq sülh eyni zamanda Türkiyə-Ermənistan münasibətlərinin normallaşması, sərhədlərin və kommunikasiyaların açılması anlamına gəlir".
Oğuz