Avropa Parlamentində Ermənistanın Aİ-yə üzvlük imkanlarının müzakirəsini təklif edən qətnamə qəbul olunub. Qətnamə layihəsində Avropa Parlamentinin üzvləri Ermənistana Aİ üzvlüyünə namizəd statusunun verilməsi imkanlarına baxmağı təklif ediblər.
Maraqlıdır, Ermənistan Avropa İttifaqına üzv olacaq? Əgər üzv olarsa Cənubi Qafqaz regionunda ciddi geosiyasi dəyişikliklər ola bilər?
Gündəm mövzusu ilə bağlı Beynəlxalq Avrasiya Mətbuat Fondunun prezidenti Umud Mirzəyev Ednews-a geniş şərh bildirib. Onun sözlərinə görə Ermənistanın daxilində olan böyük bir kəsim var ki, Aİ məsələsinin reallaşmasında maraqlıdır:
“Sovetlər dağıldıqdan sonra Avropa Tərəfdaşlıq Proqramına üzv olan ölkələr oldu. O ölklər arasında Azərbaycan və Ermənistan da vardı. Əməkdaşlıq ikitərəfli olanda daha faydalı olur. Bunun arxasında hər hansı bir siyasi məqsədlər dayananda özü ilə bərabər müəyyən probemlər də gətirir. Ermənistanın Aİ-yə üzv olmaq imkanlarının nə dərəcədə real olması mənə elə gəlir ki, qəliz görünür. Ermənistanın faktiki olaraq iqtisadi resursları bütünlüklə Rusiyaya bağlıdır. Və Ermənistanın içərisində rus hərbi qoşunları yerləşib. Cənubi Qafqazda Rusiya heç də maraqlı deyil ki, mövqelərini itirsin. Əvvəllər bu məsələ açıq şəkildə dilə gətirilməsə də, Ermənistanın forpost olması məsələsi, onların bir dövlət kimi formalaşması Rusiyanın yaradıcılığıdır. Xəritəni Rusiya çəkib. Özünün əkdiyini, becərdiyini nə dərəcə əldən verməyə maraqlı olacaq?”
U.Mirzəyev hesab edir ki, Rusiya bu məsələ ilə bağlı çox rəncidədir. Gələn mesajlar, verilən açıqlamalar ona dəlalət edir:
“Hətta iş o yerə çatıb ki, verilən mesajlarda qeyd edilir: Ermənistan torpaqlar itirəcək, parçalanacaq. Hər halda Ermənistanın Aİ-yə üzvlük məsələsi bir o qədər rahat və yaxın zamanda olacaq iş deyil. Ermənistan ilk növbədə ətrafındakı dövlətlərlə münasibətlərini tənzimləməli, eyni zamanda Rusiya ilə məsələlərini həll etməlidir. Düşünmürəm ki, Aİ özünə başağrısı yaratsın. Türkiyənin məsələsi uzun illərdi Aİ-də müzakirə edilir. Belə desək Aİ-yə hər cəhətdən Türkiyə sərf edir, nəyinki Ermənistan. Ermənistan eyforiyadadır. Eyfariya bəzən qazanılan uğurlarla bağlı olur. Ermənistan qazandığı uğursuzluqlardan eyforiyadadır”.
Oğuz