“Aprelin 5-də keçiriləcək Aİ – ABŞ – Ermənistan konfransı Cənubi Qafqazda qeyri-sabitliyi artıracaq. Avropanın şərq cinahlarında təhlükəsizlik vəziyyətini daha da gərginləşdirəcək”.
Bu sözləri Ednews-a açıqlamasında Azərbaycan-ABŞ İqtisadiyyat və Təhsil Şurasının baş direktoru və təsisçisi, BAMF-ın ABŞ-dakı nümayəndəsi Piter Teys, aprelin 5 – i Aİ – ABŞ – Ermənistan görüşünü şərh edərkən söyləyib.
“Təəssüf ki, Vaşinqton və Brüssel İrəvan – Bakı arasında davamlı sülh müqaviləsinin, gələcək nəsillər üçün iqtisadi rifahı və regional sabitliyi təmin edəcək yeganə irəliyə doğru yol olduğu konsepsiyasını bir daha dərk edə bilmədilər. Azərbaycan hökumətini bir kənara qoyub İrəvanla gizli sövdələşmələr aparmaq bir tərəfdən Vaşinqtonla Brüssel, digər tərəfdən isə Azərbaycan və Türk Dünyası arasında etimad quruculuğu tədbirlərini gücləndirmir, əksinə ona zərbə yetirir. Təəssüf ki, Ukraynada davam edən müharibə hələ də Aİ və ABŞ rəsmilərinə görünür geosiyasi dərs keçməyib”.
Həmsöhbətimiz Ermənistanın Azərbaycan ilə şərti sərhəddə ordu yığmasına da toxunub.
“Azərbaycan silahlı qüvvələri Azərbaycan və Ermənistan arasında beynəlxalq sərhədin monitorinqini və mühafizəsini yüksək səviyyədə, sayıqlıqla davam etdirməlidir. Görünən odur ki, Aİ və ABŞ hökuməti Bakı ilə ədalətli münasibət qurmamaqla, Naxçıvan Muxtar Respublikasına qarşı iqtisadi blokadanı dayandırmaq üçün Ermənistana təzyiq göstərməkdənsə, diplomatik yolla Azərbaycanı və Türkdilli Dünyanı boğmaq niyyətindədir. Naxçıvan 30 ildən artıqdır ki, Ermənistan tərəfindən iqtisadi blokadadadır. Lakin heç kim erməni blokadasından danışmayıb, günahsız Azərbaycan vətəndaşlarının müdafiəsinə qalxmayıb və Brüssel bu vaxta qədər susub”.
Əkbər Novruz