Məlum olduğu kimi, 10 iyul 2024-cü il tarixində ABŞ dövlət katibi Antoni Blinkenin təşəbbüsü və iştirakı ilə Azərbaycan xarici işlər naziri Ceyhun Bayramov və Ermənistan xarici işlər naziri Ararat Mirzoyan arasında NATO-nun 75 illiyinə həsr olunmuş Zirvə görüşü çərçivəsində Vaşinqtonda görüş keçirilib.
Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov Ednews - a açıqlamasında görüşün persdpektivləri ilə bağlı görüşlərini paylaşıb:
“İki ölkənin XİN rəhbərləri arasında keçirilən Vaşinqton görüşü Azərbaycanın slüh səylərinin davamıdır. Bu görüş bir daha sübut etdi ki, Azərbaycanda regionda uzunmüddətli və etibarlı sülhün əldə edilməsi üçün ciddi cəhdlər ortaya qoyur, bunun üçün bütün imkanlarından istifadə edir. Lakin bu səylərin səmərə verməsi üçün Ermənistanın da Azərbaycanın sülh səylərini dəstəkləməsi vacibdir. Rəsmi İrəvan regionda sülh və sabitliyi təmin etmək üçün ölkəmizin sülhpərvər siyasətini dəstəkləməli, Fransa və digər təxribatçı qüvvələrin avantüralarına boyun əyməməlidir. Çünki Cənubi Qafqazdan min kilometrlərlə uzaqda yerləşən bu ölkələrin regionda daha bir hərbi qarşıdurmanın baş verməsində maraqlı olduğu göz önündədir.
Göründüyü kimi, sülh və sabitlik Azərbaycanın siyasətində ənənəvi prioritet istiqamət olaraq qalır. Lakin Azərbaycan bununla yanaşı, dünyadakı təhdid və təhlükələri də nəzərə almaq məcburiyyətindədir. Elə bu səbəbdən də Azərbaycan öz ordusunu, Silahlı Qüvvələrini gücləndirməkdə, onun döyüş qabiliyyətini mütəmadi şəkildə artırmaqdadır. Bu gün Azərbaycan Ordusu öz gücünə və qüdrətinə görə dünyanın ən qabaqcıl dövlətləri sırasında yer alır ki, bu da hər birimizdə qürur doğurur. Çünki güclü ordu təhlükəsizliyin ən böyük qarantıdır və bizim üçün sevindiricidir ki, Müzəffər Ali Baş Komandan İlham Əliyevin rəhbərliyi altında biz bu qaranta sahibik”.
Əkbər Novruz
