Azərbaycanın Pakistanla hərbi sahədə əməkdaşlığı uğurla davam edir. Ümumiyyətlə, əməkdaşlığı hərbi sahədə də aparılmasının xüsusi əhəmiyyəti var. Azərbaycan Respublikasının Prezidenti Pakistana rəsmi səfəri zamanı iki ölkənin digər sahələrdə olduğu kimi hərbi sahələr də əməkdaşlıq etdiyini bildirib.

Bu əməkdaşlıq ordumuza hansı töhfələri verəcək? 

“Azərbaycanla Pakistan arasında hərbi əməkdaşlığın artıq uzun illərdir ki, uğurla inkişaf etməsi ilk növbədə hər iki ölkənin geosiyasi maraqları ilə şərtləndirilir. Yəni, geosiyasət, digər sahələrdə olduğu kimi, hərbi istiqamətdə də yaxınlaşmanı labüd edir. Digər sahələri vurğulayıram, çünki həqiqətən də ölkələrimiz arasında bir tək hərbi deyil, humanitar, mədəni, təhsil sahələrində də ölkələr sıx əməkdaşlıq içindədir. Bu, dövlətimizin İslamabada sonuncu səfərindən özünü açıq şəkildə birüzə verdi, birgə iqtisadi layihələr də var. Hərbi əməkdaşlığa gəldikdə, burada bir neçə ölçü var.”

Bu fikirləri Ednews-a açıqlamasında hərbi ekspert Heydər Mirzə bildirib. O, həm də qeyd edib ki, Pakistan Azərbaycan üçün müasir silahların təchizatçısı rolunu oynayır:

“Bilirsiniz, Pakistan Azərbaycan Respublikası üçün müasir silah sistemlərinin, hərbi-texniki vasitələrin  təchizatçısı rolunu oynayır. Bu sahədə əməkdaşlıq uzun illərdir ki mövcuddur. Son illərdə daha çox Pakistan istehsalı olan “JF-17 Block lll” qırıcılarından bəhs olunur, diqqət bu mövzuda cəmləşdirilib. Lakin, məlum olan başqa silah sistemləri də var ki, nəyinki tərəfimizdən Pakistandan idxal olunur, hətta real hərbi əməliyyatlarda uğurla tətbiq də olunublar. Çox vaxt deyirlər ki, Pakistan ordusu olan dövlət deyil, dövləti olan ordudur. Buna görə də, öyrənməyə çox şey var. Digər bir tərəfdən hərbi, təhsil sahələri və birgə təlimlərdir ki, bunu da olduqca vacib hesab edirəm. Məsələ burasındadır ki, Pakistan bir dövlət olaraq, hərb mədəniyyətinə sahibdir və orada ordunun rolu olduqca böyükdür. Çox vaxt deyirlər ki, Pakistan ordusu olan dövlət deyil, dövləti olan ordudur. Pakistanın düşmənləri bunu istehza ilə deyir, lakin mən bu ifadəyə müsbət məna verirəm. Məncə bu ifadə qeyd olunan ölkənin həyatının bütün istiqamətlərində ordunun rolunu əks etdirir. Uzun sözün qısası, öyrənməyə çox şey var.

Pakistan döyüşgən dövlətdir, nəhəng və nüfuzlu düşmənləri, rəqibləri var və bu nəhənglərin qarşısında artıq bir əsrə yaxın müddətdir ki nəinki tab gətirir, hətta uğurla rəqabət də aparır. Dağlıq Kəşmirdə toqquşmalar daima baş verir, terrorla mübarizə daima gedir, eyni zamanda ölkənin hərbi təhsil ocaqları da dünya miqyasında tanınır və orada bir tək pakistanlı deyil, çoxlu sayda xarici ölkələrin kursant və zabitləri təhsil alırlar. O cümlədən bizim həmvətənlərimiz.”

Ekspert Pakistan ordusunun qarşılaşdığı təhlükələr bizim üzləşdiyimiz təhlükələrə bənzədiyi üçün birgə təlimlərin sayının artırılması olduğunu düşündüyünü bildirib:

“Düşünürəm ki birgə təlimlərin sayı və miqyası artmalıdır. Çünki həm Pakistan ordusunun qarşılaşdığı təhlükələr bizim qarşımızda hal-hazırda duran çağırışlara çox bənzəyir həm də operativ-taktiki mənada coğrafiyamız, iqlimimiz çox oxşardır. Yəni, onların təcrübəsi bizim üçün abstrakt nəzəri deyil, konkret praktiki anlam daşıyır.”

Fərid