"Sülhün Kökləri" təşkilatı Beynəlxalq Avrasiya Mətbuat Fondu ilə mina probleminin 18-ci DİM kimi qəbul olunması təşəbbüsünü dəstəkləməkdən qürur duyur. Həmçinin, təşkilatımız, hazırda, minatəmizləmə sahəsində BMTİP və ABŞ Dövlət Departamenti ilə sıx əməkdaşlıq çərçivəsində fəaliyyətinə davam edir.”
Ednews xəbər verir ki, bu sözləri Beynəlxalq Avrasiya Mətbuat Fondu (BAMF) Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin dəstəyi ilə həyata keçirdiyi "Minasız dünya təşəbbüsü - BMT-nin Dayanıqlı İnkişaf Məqsədlərinin 18-ci məqsədi kimi" adlı layihə çərçivəsində keçirilən onlayn birgə görüş zamanı "Sülhün Kökləri" təşkilatının qurucusu və rəhbəri xanım Heidi Khun deyib.
H.Khun çıxışında Azərbaycanın mövcud mina problemindən və 18-ci DİM-dən danışıb:
"Azərbaycanda ilk mina sahəsini gəzdiyim zaman 2022-ci ilin martı idi. Rusiya Ukrayna müharibəsinin başlanğıcından cəmi bir həftə keçmişdi. Mən Azərbaycan – Qarabağda minalarla çirklənmənin hansı səviyyədə olduğunun şahidi oldum. Dünya Azərbaycana yaxınlaşdıqca, məncə, biz müharibə şəraitində yaşayanların, səsini çatdıra bilməyənlərin, meyvələrini biçmək üçün tarlaya çıxmalı olanların səsi olmalıyıq. Biz yaxşı başa düşürük ki, 18-ci DİM-in qəbul olunması olduqca çətin prosesdir. Ancaq unutmamalıyıq ki, ərazilər minalardan təmizlənmədikcə orada mövcud 17 DİM-lərin icrasından söhbət belə gedə bilməz."
"Minaların mənfi təsirindən əziyyətçəkən ölkələrdə qadınlar mənə deyirlər ki, qardaşları, ataları, əmiləri ön cəbhədədilər və onlar özləri yetişmiş, sulu, şirəli meyvələri yığmaq üçün tarlalarda ayaqlarının ucunda gəzməlidirlər və meyvələri dərmək üçün həyatlarını riskə atmalıdırlar. Məncə bunlar dəhşətli hekayələrdir. Bütün bunları canlı izləyirik. Basdırılan hər minanın əvəzinə əkilən hər meyvə ağacı gələcək nəsilləri qidalandırır, lakin əkilmiş hər ağac Yer Ananın ağciyərlərini bərpa edəcək karbonu özündə saxlayır və beləcə biz iqlim dəyişikliyi ilə də mübarizə aparmalı oluruq.
Sonda xanım Heydi Khun noyabr ayında Bakıda keçiriləcək COP29 konfransı ilə bağlı da fikirlərini bildirib:
“Biz səbirsizliklə Bakıda keçiriləcək qlobal COP29 konfransının başlanmasını və orada birgə iştirakımızı gözləyirik. Mən inanıram ki, tərəfdaşımız BAMF ilə birlikdə bizim orada pavilyonumuz olacaq və öz fəaliyyətlərimizi və birgə sülh missiyamızı dünya liderlərinə çatdıra biləcəyik. Biz orada da 18-ci DİM-in dəstəklənməsi üçün 2022-ci ildə BMT-nin Baş katibinə ünvanlandığımız müraciətdəki kimi çağırışlar edəcəyik. Mən inanıram ki, COP29-da tərəfdaşım Umud Mirzəyevlə birlikdə mina probleminin 18-ci SDG kimi qəbul olunmasında böyük yol qət edəcəyik.”
Qeyd edək ki, onlayn görüşdə BAMF-ın partnyorları və layihə çərçivəsində əməkdaşlıq etdiyi təşkilatlar, mina aksiyası üzrə ixtisaslaşmış ekspertlər, BMT-nin Cenevrə və İstanbul ofisindən nümayəndələr, ABŞ-dan və Avropanın digər ölkələrindən olan qonaqlar iştirak ediblər.
