Hər il keçirilən Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının (COP) bu dəfə Azərbaycanda keçirilməsi ölkəmizə nələr qazandıracaq?

Mövzu ilə bağlı politoloq Şəbnəm Həsənova Ednews-a açıqlamasında bildirdi ki, COP29-un keçirilməsi Azərbaycanın mədəni simasının təzahürü olacaq.

Onun sözlərinə görə, müasir iqlim dəyişikliyində insan təsirləri üstünlük təşkil edərək təbii dəyişkənliyin hüdudlarını aşır:

“Nüfuzlu analitiklər hesab edirlər ki, qlobal iqlim dəyişikliyinin əsas mənbəyi məhz atmosferin tərkibində birbaşa insan tərəfindən törədilən dəyişikliklərdir. Bunun kökündə dayanan məsələ isə sözsüz ki, qıt resurslar uğrunda gedən görünən və görünməyən savaşlardır. O zaman məntiqi olaraq bu dəyişkənliyin də, savaşların da dünya düzəninə, beynəlxalq əlaqələrə təsiri inkarolunmazdır. Dövlətlər əsrlər boyu davam edən ənənəvi mübarizələr qədər, bu gün yeni çağırışların həlli ilə də məşğul olmağa məcbur qalırlar. Bu prosesdə reaktiv tərəflər iz boyu davam edərkən, proaktiv aktorlar izi özləri açır. İqlim dəyişikliyinin monitorinqi və dərk edilməsində irəliləyişlər mövcuddur. Lakin əsas məsələlərdən birinin qarşısında maneələr qalmaqdadır ki, bu da sözügedən dəyişikliyin təsirlərini dəqiq planlaşdırmaq, onlara uyğunlaşmaq və yumşaltmaq üçün bir çox elmi, texniki və institusional maneələrdir. Azərbaycan dövləti məsələni kompleks şəkildə ələ alıb. Ölkənin bütün elmi potensialı, texniki və institusional qurumları COP 29-un ən yüksək səviyyədə keçirilməsinə yönəlib.

COP-un bu dəfə Azərbaycanda keçirilməsi ölkəmizə nələr qazandıracaq? sualına cavab vermədən öncə bu yola qədər olan proseslərə nəzər yetirmək lazımdır. Sözsüz ki, Azərbaycan öz ərazi bütövlüyünü və suverenliyini şəhidlərimizin sayəsində təmin etdi. Siyasi, iqtisadi, hərbi, mədəni, humanitar, ideoloji istiqamətdə atılan addımlar məhz Qarabağ Zəfərinə fokuslanmışdı. İnkar olunmaz bir fakt da var ki, o da bütün bu məsələləri koordinasıyalı şəkildə icra edən rəhbər lazım idi. Bu məsələni ona görə vurğulayıram ki, hətta tənqidi yanaşmalara baxmayaraq illər ərzində keçirilən mötəbər tədbirlərlə cənab Prezident, Müzəffər Ali Baş Komandan İlham Əliyev Azərbaycanın sülhsevər imicini formalaşdırdı. Dünyaya sübut etdik ki, biz işğala, soyqırıma məruz qalmışıq, hətta buna baxmayaraq insani simamızı itirmədən mədəni millət və xalq olduğumuzu bu tədbirlərlə sübut edirik. Ona da toxunmadan keçə bilmərəm ki, məhz bu qədər qatı münasibət bəsləyən Fransanın özündə belə hörmətli Birinci xanım Mehriban Əliyevanın rəhbərliyi altında Heydər Əliyev Fondu  mədəni, tarixi abidələrin restavrasiyasına kifayət qədər vəsait və diqqət ayırdı. İndi də Qarabağı qurmaqla sübut edirik ki, biz yıxan deyil, quran tərəfik”. 

Politoloq vurğuladı ki, bu tədbir balansın pozulması, Azərbaycanın regional və beynəlxalq miqyasda urbanizasiya, torpaqdan istifadə, iqlim dəyişikliklərinə verdiyi önəmin göstəricisidir:

“Antropogen iqlim dəyişikliyi uzun əsrlər boyu davam edəcək. İqlimlə mübarizədə naməlum bir nöqtəyə doğru gedirik və onun əlaqəli təsirləri olduqca pozucu ola bilər. Necə ki, tədbirin uğurla keçirilməsi üçün cənab Prezident İlham Əliyevin rəhbərliyi altında bütün dövlət qurumlarımız səfərbər olub, koordinasiyalı işlər görülür, cəmiyyətin də bu məsələyə diqqət yetirməsi vacibdir. Azərbaycan güclü dövlətdir. Birinci mərhələsi başa çatan, ikinci mərhələsi daha genişmiqyaslı olan hərbi sənaye kompleksi yaradırıq. Dövlət başçımızın da ifadə etdiyi kimi müstəqil siyasət aparan dövlət kimi siyasi, iqtisadi sahədə xarici təsirə məruz qalma şansımız sıfra bərabərdir. Bu qədər güclü bir dövlətin xalqı da tədbirin layiqincə keçirilməsi üçün mədəni simasını bir daha nümayiş etdirməlidir”.