Azərbaycan Mətbuat Şurası Tərtər Rayon İcra Hakimiyyəti ilə birgə vətənpərvərlik mövzusunda işıqlandırılan yazıların mükafatlandırılması üçün “Qarabağ” media mükafatı təsis edib, ilk olaraq bu mükafatın təqdimetmə mərasimi Tərtər rayonunda keçirilib.
“Eurasia Diary” xəbər verir ki, mükafatlandırma mərasimindən sonra Mətbuat Şurası üzvləri və millət vəkilləri rayon rəhbəri ilə birlikdə ön xəttə, Talış yüksəkliyində düşmənlə üz-üzə dayanmış əsgər və zabitlərlə görüş keçirilib. Onlara müxtəlif hədiyyələr təqdim olunub. Əsgərlərimizin mətanəti və döyüş ruhunu yüksək qiymətləndirən Beynəlxalq Avrasiya Mətbuat Fondunun sədri Umud Mirzəyev ordumuzun Ali Baş Komandanının əmri ilə hər an torpaqlarımızı işğaldan azad etməyə hazır olduğunu, ön cəbhədə əsgərlərimiz üçün yaradılan şəraitin və ordumuzun döyüş ruhundan məmnun qaldığını bildirib.
O, bu gün ölkə rəhbərinin cəbhə xəttinə səfərindən sonra Azərbaycanın media kapitanlarının Talış yüksəkliyinə səfəri işğalçı qüvvələr üçün bir mesaj olduğunu deyib. "Erməni hakimiyyəti anlamalıdır ki, işğal altındakı torpaqların sülh yolu ilə azad edilməsi hər bir azərbaycanlının arzusudur. İşğalçıların 20 ildən çox bir müddətdə qəbul edilmiş beynəlxalq sənədlərə əməl etmədən, işğal faktorunu davam etdirməsi heç bir beynəlxalq prinsiplərə ve eləcə də mənəvi-insani dəyərlərə uyğun deyildir".
"Bütün ermənilərə çağırış edirik" deyən BAMF sədri status-kvonun heç bir halda belə davam edə bilməyəcəyini qeyd edib. "Vəziyyətin belə davam edəcəyi təqdirdə haqqı tapdanmış, dədə -baba torpaqlarından qaçqın düşmüş milyonlarla insanın hüquqlarının bərpası və torpaqlarımızın azad olunması, erməni və azərbaycanlıların bir yerdə sülh şəraitində yaşaması üçün ordumuzun qüdrəti ilə işğal faktoru aradan qaldırılacaq. Azərbaycan öz tarixi ərazilərində nəzarətsiz qalmış, havadarlarının dəstəyi ilə bir qrup muzdlular tərəfindən işğalda saxlanılan Qarabağ torpağında sülhü bərpa edəcək”.