2022-2023-cü tədris ili üçün Azərbaycanın ali təhsil müəssisələrinə yerləşdirmənin nəticələri məlum olub.
Ali təhsil müəssisələrinin müsabiqəsində 66724 nəfər iştirak edib. Onlardan 48.841 nəfəri (o cümlədən 4927 subbakalavr) ali təhsil müəssisələrinə qəbul olunub. 23 044 (o cümlədən 253 subbakalavr) nəfər dövlət sifarişi əsasında, 25.797 (o cümlədən 4674 subbakalavr) nəfər isə ödənişli əsaslarla təhsil almaq hüququ əldə edib. Bəs maraqlıdır ki, balların bu qədər aşağı salınmasına səbəb nədir? Nəzərə alsaq ki, bir neçə il əvvəlki keçid balları ilə hazırkı keçid balları arasında ciddi fərq var. Həmçinin bu il karantin qaydalarının yumşaldılmasını da nəzərə alsaq hazırlıq prosesinə mane olan durumun olmadığını görürük. Bəs buna səbəb kimi gənclərin bilik səviyyələrinin aşağı düşməsini göstərə bilərikmi?
Təhsil eksperti Kamran Əsədov Ednews-a bildirib ki, bu il ali təhsil müəssisələrinə keçirilən qəbul imtahanları əvvəlki illərdən öz məzmununa görə fərqlənib. Bu il pandemiya dövründə təhsil almış tələbələr ilk dəfə geniş imtahan prosesinə cəlb ediliblər. Dövlət İmtahan Mərkəzi təşkil etdiyi imtahanları tam mükəmməl şəkildə həyata keçirə bilib. Hər hansısa qayda pozuntusuna müşahidə edilməyib.
“Ali təhsil müəssisələrinin ixtisas qrupları üzrə nəticələri təhlil edəndə görürük ki, ən ciddi bal artımı müqayisə ilə 1-ci ixtisas qrupunda müşahidə edilib. Belə ki, əvvəlki illərlə müqayisədə bu il İnformasiya Texnologiyaları, İnformasiya təhlükəsizliyi və Kompüter elmləri mühəndisliyi ixtisaslarının dövlət sifarişli və tədrisi ingilis dilində olan ixtisaslarda ciddi bir bal artımı müşahidə olunub. Amma bununla yanaşı 1-ci ixtisas qrupunda bəzi ixtisaslarda azalmanı da müşahidə edə bilirik. Bu il 200 balla dövlət sifarişli ixtisaslara qəbul olmaq mümkün olub. 3-cü ixtisas qrupunda isə bütün ixtisaslar üzrə kəskin bal azalmasını müşahidə etdik. Məsələn, hüquqşünaslıq fakültəsinin dövlət sifarişli ixtisas balı 520 bala kimi düşdü. Digər ixtisaslarda da keçən il 450 balla dövlət sifarişli ixtisaslara daxil olmaq qeyri-mümkün idisə, bu il 3-cü ixtisas qrupunda prestijli ixtisaslara 350 balla qəbul olmaq mümkün oldu. Ümümilikdə bu il 3-cü ixtisas qrupu digər ixtisas qrupları ilə müqayisədə ballar aşağı salındı. Bunun səbəbini isə Beynəlxalq Münasibətlər və Regionşünaslıq ixtisasının 2-ci ixtisas qrupundan 3-cü ixtisas qrupuna keçməsi oldu. Keçən ilə qədər 3-cü ixtisas qrupuna 200 balla qəbul olmaq mümkün olmuşdusa bu il isə 186 balla abituriyentlər tələbə adını qazandılar. 4-cü ixtisas qrupunu təhlil etdikdə isə Tibb fakültəsində keçən illə müqayisədə bal artımını müşahidə etdik. 3-cü ixtisas qrupundan fərqli olaraq 4-cü ixtisas qrupunda yüksək ballarla 608-610 ballarla ödənişli əsaslarla əsas ixtisaslara qəbul oldular”.
5-ci ixtisas qrupunda isə ciddi bal artımı müşahidə edilmədiyini qeyd edən ekspert ödənişli əsaslara məşqçi ixtisasının 90 bala düşdüyünü bildirir.
Ekspert bildirir ki, pandemiyanın öz nəticələri var. Məsələn, 3-cü ixtisas qrupunda yüksək ballı abituriyentlərin sayı kəskin azalmışdısa, əksinə, 1-ci ixtisas qrupunda artım müşahidə edilib.
Azərbaycan Respublikası Elm və Təhsil Nazirliyi yanında İctimai Şuranın üzvü İlqar Orucov Ednews-a açıqlamasında bildirib ki, buna səbəblərdən biri pandemiyanı misal gətirə bilərik. O qeyd edib ki, keçən ilə nisbətən bu il daha az güzəştlər olunub.
“Digər səbəb kimi Azərbaycandan xeyli sayda savadlı gənclər xaricdə təhsil almağa üz tuturlar. Onlar həmin ölkələrin tələb etdiyi imtahanları verməli olurlar. Belə ki, DİM-in imtahanlarında iştirak etmirlər. Bəzi təhsil keyfiyyəti yüksək olan məktəblər var ki, orada yüksək bal göstəriciləri olmur. Səbəb kimi isə təhsili xaricdə davam etdirməyi göstərilir. Ümumilikdə isə nəticələri qənaətbəxş hesab etmək olar”.
Ayan Rzayeva
