112 saylı məktəbdə şagirdlərdən birinin digərini döyməsi ilə bağlı yayılan görüntülər geniş rezonans doğurub. Bir qisim insan xəsarət yetirən məktəblini günahkar saydığı halda, digərləri ümumiyyətlə şagirdin təhsil ocağından xaric olunmasını tələb edib.

Həqiqətənmi məktəbli bu hərəkətinə görə təhsildən məhrum edilməlidir?

Məsələ ilə bağlı psixoloq Fərqanə Mehmanqızı Ednews-a açıqlamasında bildirib ki, hər hansı şagirdi  məktəbdən təcrid etmək düzgün qərar deyil. 

“Azərbaycan Respublikasının qanunveriliciliyində hər bir uşağın məcburi ortaq təhsil almaq hüququ var. Görünür ki, uşağın psixoloji problemi var. Ola bilər ki, ailəsinin uşaqla, cəmiyyətlə münasibətində problemi var. Əgər bu problem ailədə həll edilməsə  getdikcə, daha da böyük problemə çevrilir. Təəssüf ki, bu da gələcəkdə bizim qarşımıza daha aqressiv cəmiyyətə zərər verə bilən cinayətkarların yetişməsinə gətirib çıxara bilər. Birinci uşağın ailəsinin psixologiyasına nəzər yetirmək lazımdır. Bütün bunların fonunda bu gün valideyn olmağa hazır olmayan şəxslərin övlad sahibi olmasıdır. Bu gün psixoloqlar sərbəst şəkildə məktəblərdə seminar keçirmirlər. Bəzi uşaqlar var ki, onlar ana ata qayğısından məhrum olunublar. Məktəbdə bir psixoloqun fəaliyyəti ilə problem həllini tapmır. Valideynlər övladlarını psixoloqla danışdırsa da bəzən müsbət təsiri olmur. Bu barədə məktəb rəhbərliyi İcra Hakimiyyətləri nəzdində azyaşlılar üzrə komissiyalara müraciət etməlidirlər. Bu qurum həmin ailələrə baş çəkib onlarla danışmalıdırlar”.  

Psixoloq həmçinin qeyd edib ki, azyaşlı uşaqların bu kimi görüntülərinin yayılması qeyri-etikdir. Bu videonun jurnalistlər, sosial şəbəkə istifadəçiləri tərəfindən açıq şəkildə paylaşılması zərərçəkmiş üçün əlavə travmadır.

“Onlar başa düşməlidirlər ki, bu kimi addımlar həmin şəxsi intihara da sürükləyə bilər. Zərər yetirən şagird ilə videonu açıq şəkildə paylaşan şəxslərin psixologiyası eynidir”,- deyə psixoloq bildirib.

Ayan Rzayeva