“Elm Fondunun yaradılması ölkəmizdə elmi inkişafın tam təminatı üçün olduqca vacibdir”.
Bu sözləri Ednews-a açıqlaması zamanı Milli Məclisin Elm və təhsil komitəsinin üzvü, deputat Etibar Əliyev bildirib. O, yeni yaradılan Azərbaycan Elm Fondunun istiqamətlərini şərh edərkən qeyd edib ki, dünyanın bütün inkişaf etmiş ölkələrində bu kimi fondlar fəaliyyət göstərir.
“21-ci əsrdə elmi tədqiqatların yönümü artıq dəyişib. Azərbaycanda bir çox elmi sahələr, məsələn, genetika, molekulyar biologiya, informasiya-kommunikasiya texnologiyaları, fizika, kimya üzrə tədqiqatların aparılmasına ehtiyac var. Bütün bu tədqiqatların həyata keçirilməsi üçün mütləq maliyyə ayrılmalıdır. Bundan başqa, fondun vəsaiti hesabına müəyyən elmi kitabların çapına ehtiyac duyulur. Qeyd edim ki, biz elmi ədəbiyyatların nəşrində bəzi ölkələrdən geri qalmışıq. Dünyanın müxtəlif ölkələrində Nobel mükafatı alan alimlər kitablarını və digər elmi əsərlərini müxtəlif dillərə, xüsusilə ingilis, rus, fransız və türk dillərinə tərcümə etdirilər. Elmi ədəbiyyatın çapına maliyyə ayrılması tələbələrin, magistrların və tədqiqatçıların geniş miqyasda elmi resursları əldə etməsinə imkanlar yaradacaq”.
Deputat, həmçinin bildirib ki, gənclərin elmə motivasiya olunmasına və onların elmi fəaliyyətlərə cəlb olunmasına fondun müsbət təsirləri ola bilər.
“Fondun vəsaiti hesabına elan olunan hər hansı elmi layihənin və proqramın tətbiq olunmasında gənc alimlər mütləq iştirak etməlidir. Çünki bu, onların gələcək karyerasına öz töhvələrini verəcək. Gənc alimlərin elmi tədqiqatları qiymətləndirilməlidir”.
Eyni zamanda E.Əliyev gənclərin xarici ölkələrdə təbiət elmləri, informasiya texnologiyaları və digər elmi sahələr üzrə təcrübə kurslarında iştirak etmələri üçün şərait yaradılmasını zəruri hesab edib. Onun sözlərinə görə, bu məsələlər fondun ilkin priotetlərinə daxil olmalıdır.
“Gənclərimizin beynəlxalq səviyyədə tanınmış universitetlərinin laborotoriyalarında qısamüddətli çalışması, həmin təhsil ocaqlarında alimlərin mühazirələrini dinləməsi, seminarlarda iştirak etməsi mühümdür. Ona görə ki, onlar əldə etdikləri bilikləri və təcrübələri ölkəmizin elmi inkişafında bölüşəcəklər, onların sahəsində elmi tədqiqatların aktivliyinin indeksləri daha yüksələcək”.
Qeyd edək ki, Azərbaycan Respublikasının Prezidenti yanında Elmin İnkişafı Fondu əsasında “Azərbaycan Elm Fondu” publik hüquqi şəxs yaradılıb. Fondun nizamnnaməsinə görə, fondun maliyyə vəsaiti 4.157.866 manatdır.
Yunis Abdullayev