1926-cı il noyabrın 6-da Bakı şəhərində radiostansiyanın istismara verilməsi ilə ölkəmizdə ilk dəfə radio proqramı efirdə yayımlanıb. Məhz bu gün Azərbaycan Televiziyası və Radiosu Günü olaraq televiziya və radio işçilərinin peşə bayramı kimi qeyd olunur.
Televiziya qülləsi Bakı şəhərində 1956-cı ildə qurulub. 1956-cı il fevralın 14-də ilk dəfə TV vericisi vasitəsilə ağ-qara təsvirdə AzTV1 proqramı efirə çıxıb.
Ednews bu münasibətlə jurnalistlərin peşə bayramını təbrik edir və tanınmış televiziya əməkdaşlarının münasibətini öyrənib.
Əməkdar jurnalist, alim, bir vaxtlar Aztv-nin əməkdaşı olmuş Vüqar Qaradağlı peşə həmkarlarını təbirk edərək bunları deyib:
“AzTv bütün televiziyaların ana televiziyasıdır. Radio işlərinin Azərbaycan Dövlət Televiziyasının yaranmasında müstəsna rolu olub. Televiziyanın yaranması Azərbaycanın həyatında çox böyük hadisə oldu. Hər evdə dövlətin səsi video kimi göründü. Mənim həyatımda Aztv-nin rolu danılmazdır. Çünki atam, anam, bacım, həyat yoldaşım hamı Azərbaycan televiziyasının işçiləri, əməkdaşları olub. Özüm də vaxtilə bu kanalda veriliş aparmışam. Ərəb dili verilişi olub. Sonra elə bir dövr gəldi ki, müstəqil televiziyalar yaranmağa başladı. Onların hamısı Azərbaycan televiziyasının bazasında yarandı. ANS, Space, Lider və digər kanalların özəyi Azərbaycan televiziyasından qaynaqlanır. Ona görə də Aztv-nin bayramı təkcə Azərbaycan televiziyasının bayramı deyil, bütün Azərbaycanın bayramıdır. Bu gün mənim üçün də böyük bayramdır. Çünki həyatımın bir hissəsini televiziyada keçirmişəm, oradan çox şey öyrənmişəm. Ustad televiziya işçilərindən Fuad Vəlixanov, Vaqif Sənani, Əhməd Oruc kimi şəxsiyyətlərdən öyrənmişəm. Azərbaycan televiziyasının həm mənim, həm də cəmiyyətin həyatında müstəsna xidməti və rolu var”.
Azərbaycan Televiziyasında proqram müəllifi və telejurnalist Dilarə Səlim də təbriklərə qoşulub. O qeyd edib ki, AzTv təkcə orada işləyənlər üçün deyil, bütün televiziya kanalları üçün bir məktəbdir.
“Birincisi, ona görə ki, Şərqdə ilk yaranan televiziya kanalıdır. İndinin özündə də AzTv digər kanallar üçün örnəkdir. Məktəb statusunu hələ də qorumaqdadır. Həyatımda bu kanalın rolu çox böyükdür. Demək olar həyatım AzTv-nin, televiziyanın özüdür. Həyatımın böyük hissəsini burada keçirmişəm. Mənim üçün doğma ocaqdır. Rolu bir şəxsiyyət kimi formalaşmağımda böyükdür. Çünki əvvəl diktor, sonra aparıcı, daha sonra isə jurnalist kimi formalaşmışam”.
Qeyd edək ki, 2020-ci il dekabrın 31-dən etibarən radio-televiziya yayımının təşkili işğaldan azad edilən Şuşa, Xankəndi şəhərləri və Xocalı, Ağdam rayonları, eləcə də ətraf yaşayış məntəqələrində bərpa edilib.
Oğuz Ayvaz
