Milli Məclisin Elm və təhsil komitəsinin sədri Bəxtiyar Əliyev gənclərin işlə təmin olunması ilə bağlı aktual problemdən danışıb.

 

O qeyd edib ki, dövlət ali təhsil müəssisələrinə kifayət qədər vəsait xərcləyir, lakin məzunlar sonradan iş tapmaqda çətinlik çəkir. 

 

Bu zaman sual yaranır - nə üçün dövlətin vəsaiti havaya sovrulur?

 

Gənclərin işsizlik probleminin həllində təhsilin rolu barədə danışan Azərbaycan Respublikası Elm və Təhsil Nazirliyi yanında İctimai Şuranın üzvü, fəlsəfə doktoru İlqar Orucov Ednews-a açıqlamasında bildirib ki, ali təhsil müəssisələrinin kadr hazırlığı istiqamətində böyük çatışmazlıqlar var: 

 

“Ali təhsil ocaqlarının heç də hamısı yüksək səviyyədə kadr hazırlığı ilə məşğul olmur. Bu həm də universitetlərə olan inamı azaldır. Bunun səbəblərini aradan qaldırmaq istiqamətində bəzi universitetlər iş görür. Tədris olunan müvafiq ixtisaslar üzrə biliklərin vaxtında verilməsi, eyni zamanda əmək bazarının tələbləri çərçivəsində kadr hazırlığı buna hesablanmış siyasətdir”. 

 

 

Söhbət zamanı ekspert təhsildəki bəzi problemlərdən də söz açıb:

 

“Tədris proqramlarının yenilənməsinə ehtiyac var, dərslik mövzusu ciddi məsələdir, amma hələ ki, öz həllini tapmayıb. Pedaqoji heyətin yenilənməsi istiqamətində də ciddi işlər görülməlidir. Kadr hazırlığı istiqamətində bəzi hədəflərə çatmışıq. Peşə məktəblərinin əlçatanlığı maliyyə tələb edir, bunu yetərincə təmin edə bilməsək də yeni peşə məktəblərinin açılması və peşə ixtisaslarının tədrisi istiqamətində yaxşı nümunələr var. Xatırlatmaq yerinə düşər ki, Sovet vaxtı bütün peşə məktəbləri bütün rayonlar üzrə fəaliyyət göstərirdi. İndi bunu reallaşdırmaq çətinləşib, maliyyə yetəri qədər olmalı, infrastruktur yenilənməlidir. Elm və Təhsil Nazirliyi, Peşə Agentliyi hər bir regionun iqtisadi bazar tələblərini nəzərə almaqla bu yöndə işlərini davam etdirir”. 

 

İ.Oruov ali məktəbi fərqlənmə diplomu ilə bağlı bitirən məzunlarla bağlı səslənən təkliflərə də öz fikrini bildirib: 

 

“Mən özüm ali təhsili fərqlənmə diplomu ilə başa vurmuşam, bu mənə müəyyən üstünlüklər qazandırıb. Amma düşünmürəm ki, biz işə qəbul prosesində fərqlənmə diplomuna xüsusi önəm verməliyik. Bu sadəcə məzun olmuş tələbənin universitetdə təhsil aldığı illərdə qiymət göstəricilərini əks etdirir. İşə qəbul prosesində isə savadla bərabər, bilik və bacarıqlar da rol oynayır. Ali təhsil diplomu ilə məzun gedib iş tapa bilmirsə, deməli,univesitetin verdiyi təhsildə problem var. Tələbə düşünməlidir ki, mən yaxşı oxusam, sabah iş tapa biləcəm – bu düşüncənin yaranması üçün çalışmalıyıq”.

 

 

Törə Zeynal

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary