Bir çox insan məktəblərdə keçirilən dərslərin keyfiyyətindən razı deyil. Bu narazılığın səbəbi repetitor yanına getməyən əksər abituriyentlərin qəbul imtahanında yüksək olmayan nəticə göstərməsidir. Buna görə də, əksər valideynlər müəyyən sinifdən sonra övladlarının məktəb tapşırıqlarından çox, repetitorun verdiyi tapşırıqlara əməl etməsini üstün tuturlar. Hətta belə fikirlər var ki, repetitor hazırlığı olmasa, universitetlərə qəbulda bu qədər yüksək nəticə olmaz. Repetitor hazırlığı olmasa, necə olar?

Bu barədə Ednews-a təhsil eksperti Elçin Əfəndiyev geniş şərh verib. Onun sözlərinə görə, repetitor hazırlığı demək olar ki, 2002-03-cü illərdə ölkəmizdə daha geniş vüsət almağa başladı: 

“Nəticə etibarı ilə indiki dövrü dəyərləndirsək, ümumiyyətlə, pandemiyadan sonra kəskin şəkildə repetitor fəaliyyəti və bu istiqamətdə işlə məşğul olan şəxslər də artdı. Hazırda elə bir vəziyyət formalaşıb ki, sanki təhsil müəssələri yalnız attestat vermək funksiyasını yerinə yetirir. Valideynlərin böyük əksəriyyəti övladlarını 7-8-ci sinifdən sonra repetitor hazırlığına yönəldirlər. Şagirdlə ali təhsil üçün hazırlıq mərkəzlərinə, kurslarına üz tuturlar. Bunun əsasında da yüksək balla universitetlərə qəbul olunurlar. Bu gün bəzi valideynlər dərs yükünün çoxluğundan, qəbul proqramının yükündən şikayət edir. Təbii ki, burada valideynləri anlamaq çətin deyil”. 

Ekspert qeyd etdi ki, bu gün 1 milyon, 600 mindən çox şagird təhsil alır. Onların demək olar böyük əksəriyyəti repetitor hazırlığına üz tuturlar:

“Nəzərə alsaq ki, məsələn, ali təhsil müəssələrinin üçüncü ixtisas qrupuna 7 fənn üzrə qəbul imtahanı verir, bu da abituriye nt üçün 7 fənn üzrə hazırlığa getməsi deməkdir. Kifayət qədər çətin prosesdir. Təxmini hesablasaq bir şagird üçün hazırlıq kursları 500 manatdan yuxarıdır. Bunu da 3 ilə bölsək valideyn təxminən 15-20 min pulu hazırlıqlara xərcləməlidir. Hətta elə bir acınacaqlı hal formalaşıb ki, birinci sinifdən etibarən valideynlər övladlarını hazırlığa qoyurlar. Bu da heç xoşagələn deyil”. 

E.Əfəndiyev sonda repetitor hazırlığı olmasa sualını bu cür münasibət bildirdi:

“Ümumi statistikaya baxsaq bu ilki 57 min yerə plan ayırlmışdısa onun ən azından 50 mini boş qalardı. İmtahan verən abutiriyentlərin, şagirdlərin demək olar 50 mini müəyyən hazırlıqların, repetitor fəaliyyətinin nəticəsində qəbul ola bilirlər. Yerdə qalan 6-7 min nəfər müvafiq olaraq məktəblərdə aldıqları bilik əsasında qəbul olunurlar. Aidiyyatı qurumlar bu məsələni daha dərindən təhlil edib, dəyərləndirib məntiqi qərara gələcəklər”. 

Oğuz