ABŞ-də ağıllı neyron şəbəkələrini inkişaf etdirəcək superkompyuterin yaradılması üçün 500 milyard dollar ayrılıb. Bunun üçün "OpenAI" süni intellekt tərtibatçısı, Yaponiyanın "SoftBank" konqlomeratı və ABŞ-nin "Oracle" proqram nəhəngi güclərini birləşdirirlər. "Stargate" adlanan layihənin məqsədi yeni nəsil süni intellektin inkişafıdır.

"EDnyus" xəbər verir ki, bu barədə ABŞ Prezidenti Donald Tramp xəbər verib.

Onun sözlərinə görə, üç şirkətin hər biri 100 milyard dollar ilkin sərmayə qoyacaq və növbəti illərdə layihəyə ümumi investisiya həcmi yarım trilyon dollara çatacaq.

"Stargate" süni intellekt sahəsində inqilabi nailiyyətləri dəstəkləmək üçün fiziki və virtual infrastrukturun yaradılması ilə məşğul olacaq. Ölkəboyu böyük data mərkəzlərinin tikintisi planlaşdırılır, bu isə ABŞ-də 100 000-dən çox iş yeri deməkdir.

İlk 100 milyard dollarlıq tranş dünyanın ən böyük data mərkəzinin tikintisinə yönəldiləcək. Mərkəz Texasda yerləşəcək və burada "OpenAI" superkompyuter üzərində işləyəcək.

Ağ Evdəki tədbirdə hər üç iştirakçı şirkətin rəhbərləri iştirak edib. Onlar süni intellektin səhiyyənin təkmilləşdirilməsi və bəşəriyyətin ən mürəkkəb problemlərinin həlli üçün böyük potensialını vurğulayıb.

Adları hələ açıqlanmayan digər investorların da təşəbbüsə qoşulması gözlənilir.