Yaponiya Kosmik Agentliyi (JAXA) Marsa müxtəlif tədqiqat aparatlarını təhlükəsiz şəkildə endirmək üçün istifadə ediləcək platformaların əsas texnologiyasını inkişaf etdirməyi planlaşdırır.
“EDnews” xəbər verir ki , sistemin əsasını doldurulmuş qoruyucu ekranın istifadəsi təşkil edir. Bu ekran platformanın Mars atmosferində lazımi sürətə qədər yavaşlamasına və son mərhələdə mühərriklərin işə salınması ilə yumşaq enişə imkan verəcək.
Layihənin texniki detalları açıqlanmır, lakin JAXA vurğulayıb ki, bu sistem vasitəsilə Marsa kütləsi 200 kiloqrama qədər olan yüklər, məsələn, kiçik roverlər çatdırıla bilər. Hazırlanma prosesi sıfırdan başlanmır. Agentliyin mühəndis və alimləri 2024-cü ilin yanvarında Aya eniş etmiş “SLIM” modulunun göndərilməsi zamanı əldə edilən təcrübədən istifadə edirlər. Həmin eniş mühərrikin zədələnməsi səbəbindən çox da yumşaq enməsə də, ümumilikdə missiya JAXA üçün çox dəyərli məlumatlar əldə etməyə imkan verib. Agentlik yaxın gələcəkdə Marsın peyki Fobosdan torpaq nümunələri toplamaq üçün zond göndərilməsini nəzərdə tutan MMX layihəsi çərçivəsində əldə edilən təcrübəni də nəzərə alır.
Şişmə qoruyucu ekranın üstünlüyü ondadır ki, yüksək sürətlə hərəkət edən aparatların əyləclənməsi üçün mürəkkəb paraşütlərə və ağır qoruyucu qalxanlara ehtiyac qalmır. Materialşünaslıq sahəsindəki müasir nailiyyətlər sayəsində elastik materialdan hazırlanmış, lakin kifayət qədər möhkəm, yüngül və kompakt konstruksiyalar yaratmaq mümkündür.
Fatimə Mərdanlı // EDnews
