Yaponiyanın “World Investors TV” internet televiziyasında Xocalı faciəsinin 25-ci ildönümünə həsr olunan xüsusi veriliş yayımlanıb.
Verilişin aparıcısı Angelina Hiroko Ueyamanın suallarını cavablandıran Azərbaycan-Yaponiya Dostluq Mərkəzinin sədri, Dünya Azərbaycanlılarını Əlaqələndirmə Şurasının üzvü Xəlil Kələntər və Hokkaydo Universitetinin doktorant-tələbəsi Əlibəy Məmmədov Ermənistan-Azərbaycan, Dağlıq Qarabağ münaqişəsi ilə bağlı həqiqətlər, həmçinin Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” kampaniyası çərçivəsində görülən işlər barədə ətraflı məlumat veriblər.
Qeyd edilib ki, 1992-ci il fevralın 25-dən 26-na keçən gecə törədilmiş Xocalı qətliamı Dağlıq Qarabağ münaqişəsi zamanı öz qəddarlığı ilə seçilən ən dəhşətli, qanlı hadisədir. Faciə zamanı 106-sı qadın, 63-ü uşaq, 70-i qoca olmaqla, 613 nəfər dinc sakin xüsusi qəddarlıqla qətlə yetirilib. Keçmiş sovet ordusunun 366-cı motoatıcı alayının dəstəyi ilə erməni silahlı qüvvələri şəhəri tərk etməyə çalışan mülki əhaliyə qarşı hücuma keçərək onlarla amansız davranıb. Həmin müdhiş gecədən 25 il keçməsinə baxmayaraq, hələ də bu cinayəti törədənlərdən heç biri mühakimə edilməyib, beynəlxalq məhkəmə qarşısında cavab verməyib.
Canlı efir zamanı ermənilər tərəfindən törədilən Xocalı soyqırımından ətraflı söhbət açan iştirakçılar bu faciəni XX əsrin ən böyük cinayətlərindən biri kimi qiymətləndirərək pisləyiblər. Vurğulanıb ki, Azərbaycan rəhbərliyinin məqsədyönlü siyasəti və Heydər Əliyev Fondunun vitse-prezidenti Leyla Əliyevanın səyləri nəticəsində Xocalı faciəsi beynəlxalq səviyyədə soyqırımı kimi tanıdılmaqdadır. Artıq dünyanın bir çox ölkələri, o cümlədən ABŞ-ın 21 ştatı parlament səviyyəsində Xocalı faciəsini soyqırımı kimi tanıyıb.
Verilişdə bu soyqırımının səbəbkarlarının cəzasız qalmayacağı vurğulanıb, Prezident İlham Əliyevin rəhbərliyi ilə ölkəmizin iqtisadi yüksəlişindən, Azərbaycan Ordusunun qüdrətlənməsindən danışılıb. Qeyd edilib ki, Azərbaycan hökuməti ölkənin sabit və davamlı inkişafı naminə var gücü ilə çalışır və iqtisadi cəhətdən güclü, siyasi cəhətdən sabit bir dövlət quruculuğuna nail olub. Bu gün Azərbaycanda dünya liderlərinin strateji əhəmiyyətli görüşləri, beynəlxalq səviyyəli tədbirlər keçirilir.
Bildirilib ki, Azərbaycan ərazilərinin işğal altında qalması ilə heç vaxt barışmayacaq. Əgər düşmən sülh yolu ilə işğal etdiyi ərazilərdən çıxmasa, Azərbaycan Ordusu silah gücünə buna nail olmağa hazırdır.
Verilişdə faciənin 25-ci ildönümü ilə bağlı dünyanın müxtəlif yerlərində soydaşlarımız tərəfindən təşkil edilən aksiyalar barədə də məlumat verilib, soyqırımı əks etdirən fotolar yapon tamaşaçılara təqdim olunub.
