Cari ilin yanvar-avqust ayları ərzində Ədliyyə Nazirliyinin rayon (şəhər) qeydiyyat şöbələri tərəfindən ölkədə 95395, yaxud hər gün orta hesabla 393 doğulmuş körpə qeydə alınıb.
Əhalinin hər 1000 nəfərinə bu göstərici 14,7 təşkil edib. Doğulan körpələrin 53,0 faizi oğlan, 47,0 faizi isə qız uşaqlarıdır. Maraqlıdır oğlanların sayının qızlara nisbətən çox olması gələcəkdə genefondumuzda hansı problmlə nəticlənər? Məsələ ilə bağlı Eurasia Diary-yə açıqlama verən millət vəkili Musa Quliyev deyir ki, oğlanlar və qızlar arasında olan bu fərq elə də ciddi deyil. Amma bu subyektiv müdaxilənin, insan müdaxiləsinin olmasının göstəricisidir. Yəni abortların olması bu rəqəmlərdəki fərqdə bir fakt kimi görsənir. Bütün hallarda bununla bağlı mübarizə tədbirləri aparılmalıdır. Əslində bu problemlə bağlı səhiyyə nazirliyi sərəncamlar verir. Amma qanunvericilik sahəsində bir qədər boşluq var. Millət vəkilinin sözlərinə görə, parlamentin payız sessiyasında reproduktiv sağlamlıq haqqında qanun layihəsinin qəbul olunması da gözlənilir. “Qanun layihəsində belə bir qadağa var. Uşağın cinsiyyətinə görə ultrasəs müayinəsinin aparılması, eyni zamanda cinsə görə abortun olunması da qadağandır. İstisna hal isə ondan ibarətdir ki, əgər anada hamiləlik dövründə ciddi bir xəstəlik aşkarlanarsa o zaman tibbi müdaxilə edilməsinə göstəriş verilə bilər. Yəqin ki, buna inzibati və cinayət məcəlləsində də uyğun dəyişikliklər olunacaq”-deyə Musa Quliyev əlavə edib. Millət vəkili problemin həllində maarifləndirmənin də vacibliyini vurğuladı.
“Bu həm də mədəniyyət məsələsidir. Şəxsin dünyadan köçməsi Allahın işidir. Bizim dinimiz də abortu qəbul etmir. Eyni zamanda onu da deyim ki, bu problem tək bizim ölkənin problemi deyil. Bütün Şərq ölkələrində var bu problem. Avropa üçün isə bu artıq keçilmiş bir yoldur. Hətta Ermənistan və Gürcüstanda da uşağın cinsiyyətinə görə edilən abortlara rast gəlinir"-deyə Musa Quliyev bildirib. Onun fikrincə həm qanunvericilik baxımından cəzalar sərtləşdirilməlidir, eyni zamanda maarifləndirilmə işi gücləndirilməlidir, həmçinin din də öz sözünü deməlidir. Problemlə mübarizə kompleks şəkildə aparılmalıdır.