Noyabrın 9-da Dövlət Bayrağı Günü münasibətilə Ağdaş rayonunda yol hərəkəti qaydalarının təbliği ilə bağlı maarifləndirici tədbir keçirilib. Daxili İşlər Nazirliyinin mətbuat xidmətindən verilən məlumata görə, Ağdaş Rayon Polis Şöbəsinin Dövlət Yol Polisi Bölməsi və rayonun “İSTƏK” liseyinin birgə təşəbbüsü ilə təşkil olunan “Vətən yollarında əzəmətlə dalğalan, üçrəngli Bayrağım!” adlı yol hərəkəti təhlükəsizliyi ilə bağlı maarifləndirici tədbirin keçirilməsində əsas məqsəd sürücülərin, piyadaların və sərnişinlərin yol hərəkəti təhlükəsizliyi qaydaları ilə bağlı bilgilərinin və məsuliyyətlərinin daha da artırılması, hərəkətin təhlükəsizliyinin daha etibarlı qorunmasıdır. Tədbirdə Ağdaş DYP-nin rəisi Namiq Qəmbərov, müvafiq sahənin inspektorları və yol patrul əməkdaşları, “İSTƏK” liseyinin bir qrup müəllim və şagirdləri iştirak ediblər.
Tədbir çərçivəsində Ağdaş şəhərinin mərkəzi küçələrində simvolik olaraq şagirdlərin göstərişi ilə yollarda hərəkət edən avtomobillər dayandırılıb və 9 noyabr – Dövlət Bayrağı Günü müansibətilə sürücülərə təbrik çatdırılıb. Yol Patrul Xidməti əməkdaşlarının köməyi ilə saxla əmrinə uyğun dayanacağa dəvət olunan sürücülərə yol hərəkəti qaydaları ilə bağlı suallar ünvanlanıb. Sualları düzgün cavablandıran hər bir sürücüyə Azərbaycan bayrağı hədiyyə edilib. Ümumilikdə reyd zamanı 100-dən çox sürücü şagirdlər və yol polisi əməkdaşları tərəfindən mükafatlandırılıb.
DYP əməkdaşları və şagirdlər tədbirin təşkil edilməsindən razı qaldıqlarını bildirib və belə tədbirlərin maarifləndirici əhəmiyyətinin yüksək olduğunu, gələcəkdə də əməkdaşlığın yaxşı səmərə verəcəyini qeyd ediblər. İctimai maarifləndirmə yolu ilə azyaşlı uşaqların, məktəblilərin və digər piyadaların vurulması hallarının qarşısını almaq, sürücülərin təhlükəsizlik qaydalarına daha diqqətli əməl etmələrini nəzərə çatdırmaq üçün belə tədbirlərin davamlı təşkil olunacağı diqqətə çatdırılıb.
.jpeg)
