Amerikalı jurnalist, “Kent” Çikaqo Universitetinin siyasi və beynəlxalq münasibətlər üzrə eksperti Piter Tes Azərbaycana səfəri zamanı Beynəlxalq Avrasiya Mətbuat Fondunun (BAMF) ofisində olub. Səfərin məqsədi BAMF-ın işi və onun humanitar fəaliyyəti ilə tanış olmaq, həmçinin əməkdaşlığa dair məsələləri müzakirə etmək idi.
Umud Mirzəyev BAMF-ın ofisində qonaqla görüşüb və Fondun fəaliyyətinin əsas istiqamətləri barədə qonağa məlumat verib. Bildirib ki, BAMF 1992-ci ildə təsis edildiyi andan etibarən fəaliyyətini genişləndirərək Azərbaycandan kənarda, dünyanın müxtəlif ölkələrində tərəfdaşlardan ibarət geniş şəbəkəyə malikdir. Fondun prezidenti qonağa BAMF-ın 25 il ərzində vətəndaş cəmiyyəti, qaçqın və məcburi köçkünlərlə iş istiqamətində həyata keçirdiyi layihələr barədə məlumat verib. Mətbuat qurumu olaraq obyektiv informasiyanın yayılması da Fondun fəaliyyətinə daxildir. Beynəlxalq strukturlar, BMT agentlikləri, Azərbaycandakı diplomatik missiyalarla əməkdaşlıq edən Fond müxtəlif humanitar layihələr həyata keçirir. Umud Mirzəyev regionda sülhün təmin olunmasının vacibliyini vurğulayıb. O qeyd edib ki, münaqişədən daha çox dinc əhali əziyyət çəkir.
Görüşdə Piter Tes və BAMF prezidenti Umud Mirzəyev bir sıra məsələlərə, eləcə də əməkdaşlığın genişləndirilməsi mövzusuna toxunublar.
BAMF prezidenti ilə görüşdən sonra Piter Tes Fondun və Eurasia Diary analitik-informasiya portalının iş şəraiti ilə tanış olub. Ona Fondun dərc etdirdiyi kitablar təqdim olunub. Həmçinin Piter video-çarxlar və sənədli filimlər, eləcə də studiya tərəfindən həyata keçirilən layihələrin montaj olunduğu “Eurasia Production”-ın studiyası ilə tanış olub. O, studiyanın Tərtərin Həsənqaya və Şıxarx kəndlərində yaşayan uşaqlar haqqında çəkdiyi və BMT-nin Cenevrədəki ofisində nümayiş olunan “Müharibənin uşaqları” adlı videonu izləyib. Videoya baxarkən Piter Tes göz yaşlarını saxlaya bilməyib. Videoçarxda izlədiklərindən mütəəssir olan Piter Tes deyib:
“İnsanların çoxu azərbaycanlıların üzləşdiyi faciə barədə heç nə bilmir. Dağlıq Qarabağ münaqişəsini işıqlandırmaq çox önəmlidir. Allah bilir, bu uşaqlar cəbhə xəttində necə yaşayır, nə ilə məşğul olur? Biz onlardan çox uzağıq”.
O, Dağlıq Qarabağ münaqişəsinin işıqlandırımasının, işğalçıların qətlə yetirdiyi günahsız dinc sakinlər, qaçqın və məcburi köçkünlərin məhrumiyyətləri barədə dünyaya danışmağın vacibliyini vurğulayıb. Cəbhəyanı ərazilərdə işğalçıların törətdiyi dağıntılar, vandalizm faktları Piteri dəhşətə gətirib. O, müharibədən əziyyət çəkmiş azərbaycanlıların həyatı, hər gün işğalçıların hədəfinə çevrilmiş dinc sakinlər və onların uşaqları barədə dünyaya danışmaq istədiyini bildirib.
Piter Tes BAMF-ın BMT ECOSOC-la əməkdaşlığının və 25 il aktiv fəaliyyət göstərməsinin əhəmiyyətini vurğulayıb. Qarşılıqlı faydalı əməkdaşlığın qurulmasının vacib olduğunu qeyd edib.
Qeyd edək ki, Piter Tes dağlıq Qarabağ münaqişəsi haqqında bir neçə kitabın müəllifidir. Budəfəki səfərində Piter Azərbaycan Dillər Universitetində və Bakı Slavyan Universitetində bir sıra mühazirələrlə çıxış edib.