Soyqırımların hələ davam etdiyi vaxt yaranmasına baxmayaraq, Azərbaycan parlamentində 21 erməni deputat var idi. Azərbaycan Xalq Cümhuriyyəti dünyaya göstərdi ki, biz keçmişlə yaşamırıq, gələcəklə yaşayırıq, humanist dövlətik və xalqlara bir ovuc cəllada görə münasibət bəsləmirik.
Bunu Azərbaycan Milli Elmlər Akademiyasının Tarix İnstitutunun direktoru, Milli Məclisin deputatı, akademik Yaqub Mahmudov CBC televiziya kanalına müsahibəsində deyib.
Akademik bildirib ki, ermənilərin burada ərazisi olmayıb:
“Ermənilər 19-cu əsrin əvvəllərində Qafqaza köçürülüb gətirilmişdilər. Ermənilərə bizim torpağımızda dövlət yaratdılar. O dövlət necə yaradıldı? Bu məsələ olduğu kimi araşdırılmalıdır”.
Yaqub Mahmudov deyib ki, Azərbaycan Xalq Cümhuriyyətinin tarixi ilə bağlı çox hadisələr araşdırılmalı və özünün düzgün qiymətini almalıdır. Onun sözlərinə görə, Birinci Dünya müharibəsinin gedişində Cənubi Qafqazda yalnız iki xalqın - Azərbaycan və gürcü xalqlarının respublika yaratmaq hüququ vardı. Bununla belə, həmin illərdə ermənilərin də dövlət yaratması təşəbbüsünü Osmanlı Türkiyəsinin bəzi siyasi dairələri dəstəkləyiblər.
“Bolşevik Rusiyası bizi tanımadı. Tanımadı və Cümhuriyyət yaranan vaxtdan buranı işğal etməkdən ötrü hərbi hazırlıqlar görməyə başladı. Əsas məsələlərdən biri də ondan ibarət idi ki, bolşevik Rusiyası sifarişlə Qarabağdakı separatçı erməniləri bizə qarşı qaldırdı. Cümhuriyyət də öz ordusunu Qarabağa göndərməli oldu. 1988-ci ildə də yenə də həmin ssenarini həyata keçirdilər, yenə də Qarabağda indiki Sərkisyan kimi başkəsənlər, cəlladlar separatçı hərəkatın başında durdular. Yəni, tarix təkrar olundu”.(axar.az)
