Daşkənddəki Heydər Əliyev adına Azərbaycan Mədəniyyət Mərkəzində (AMM) 20 Yanvar faciəsinin ildönümünə həsr olunan anım mərasimi keçirilib.
Tədbirdə Azərbaycanın Özbəkistandakı səfirliyinin, AMM-nin, Özbəkistan-Azərbaycan Dostluq Cəmiyyətinin əməkdaşları, soydaşlarımız, qardaş özbək xalqının nümayəndələri, məktəblilər, jurnalistlər iştirak ediblər.
Mərkəzin foyesində Mədəniyyət Mərkəzinin nəzdindəki rəsm dərnəyinin istedadlı uşaqlarının 20 Yanvar faciəsi ilə bağlı çəkdikləri rəsmlər, habelə fotoşəkillərdən ibarət sərgi nümayiş etdirilib.
Tədbirdən əvvəl faciə qurbanlarının əziz xatirəsi bir dəqiqəlik sükutla yad olunub, “Şəhidləri unutmayacağıq” adlı kompozisiyadakı şamlar yandırılıb.
Azərbaycanın Özbəkistandakı səfiri Hüseyn Quliyev 20 Yanvar faciəsinin Azərbaycanın istiqlalı yolunda çətin sınaq olduğunu və xalqımızın qəhrəmanlığını bütün dünyaya nümayiş etdirdiyini qeyd edib.
Səfir bildirib ki, faciədən bir gün sonra o vaxt Moskvada yaşayan ulu öndər Heydər Əliyev Azərbaycanın bu şəhərdəki nümayəndəliyinə gedərək hadisələrə kəskin etirazını bildirib. Heydər Əliyev xalqımızın təkidli tələbi ilə hakimiyyətə qayıtdıqdan sonra Ulu Öndərin təşəbbüsü ilə Azərbaycan Milli Məclisi 20 Yanvar faciəsinə siyasi-hüquqi qiymət verib.
Hüseyn Quliyev bildirib ki, Ümummilli Liderin siyasi kursunun davamçısı olan Azərbaycan Prezidenti İlham Əliyev dövlətimizin daha da gücləndirilməsi üçün əvəzsiz işlər görüb. Azərbaycan bu gün sürətlə inkişaf edir, iqtisadi inkişafına görə regionun lider dövlətinə çevrilib.
Özbəkistan-Azərbaycan Dostluq Cəmiyyətinin nümayəndəsi, dosent Gülbahar Aşurova bu hüzn günündə Azərbaycan xalqına başsağlığı verib, şəhidlərin qanının yerdə qalmadığını, Azərbaycanın öz müstəqilliyini əldə etdiyini bildirib. Gülbahar Aşurova Özbəkistanın Xalq Şairi Camal Kamalın “Azərbaycan” şeirini söyləyib.
Daha sonra Mədəniyyət Mərkəzinin nəzdindəki Azərbaycan dili kurslarının şagirdləri 20 Yanvar şəhidlərinə dair şeirlər oxuyublar.
Anım tədbirində faciə qurbanlarına həsr olunmuş rekviyem iştirakçılara təqdim edilib. Nizami Gəncəvi adına Daşkənd Dövlət Pedaqoji Universitetinin dosenti Davron Kadirovun rəhbərliyi ilə ansambl özbək muğam və ağılarını, xanəndə Şaxistə Pirnazarova qəmli xalq musiqilərini ifa edib.
Mərasimdə 20 Yanvar faciəsindən, Ermənistan-Azərbaycan, Dağlıq Qarabağ münaqişəsindən bəhs edən kitab sərgisi nümayiş etdirilib.