Birləşmiş Millətlər Təşkilatı (BMT) Baş Assambleyasının 72-ci sessiyasının sədri Miroslav Layçak ADA Universitetində "Çoxtərəfli əməkdaşlığın hazırkı vəziyyəti" mövzusunda çıxış edib.
Eurasia Diary-nin verdiyi xəbərə görə, görüşdə Azərbaycan Respublikası Milli Məclisinin deputatları, diplomatik missiyaların nümayəndəlikləri və BMT-nin müxtəlif qurumları, vətəndaş cəmiyyəti, eləcə də, aralarında Birləşmiş Millətlər Təşkilatı İqtisadi və Sosial Şurasının (ECOSOC) Əsas məşvərətçi statuslu üzvü olan Azərbaycanda yeganə təşkilat, Beynəlxalq Avrasiya Mətbuat Fondu (BAMF) da olmaqla bir sıra QHT-lərin nümayəndələri iştirak edib. ADA Universitetinin rektoru Hafiz Paşayev moderator kimi çıxış edibi. Tədbirdə həmçinin, Azərbaycanın BMT-dəki səfiri Yaşar Əliyev və BMT-nin Azərbaycandakı rezident əlaqələndiricisi Qulam İsakzai də iştirak ediblər.
Məruzə ilə çıxış edən Miroslav Layçak ölkələr arasında çoxtərəflilik və əməkdaşlıq ideyasının inkişaf etdirilməsinin vacibliyini qeyd edib. O, bütün ölkələrin eyni imkanlara malik olduğu müasir beynəlxalq münasibətlərdə çoxtərəfli bir sistem olan BMT-nin və xüsusilə də, Baş Assambleyanın unikallığını vurğulayıb. Miroslav Layçak BMT Baş Assambleyasının fəaliyyətinin münaqişələrin qarşısının alınması; miqrasiya; BMT-nin davamlı inkişaf məqsədləri və iqlim dəyişikliyi üzrə işin həyata keçirilməsinin sürətləndirilməsi; insan hüquqlarının qorunması; dünyada baş verən dəyişikliklərə uyğun olaraq islahatların həyata keçirilməsi olmaqla beş prioritet sahəsi barədə danışıb. Miroslav Layçak dialoq, anlayış və birgə fəaliyyətin inkişafına daha çox diqqət yetirilməsi lazım olduğunu bildirib.
Çıxışının ardından Miroslav Layçak iştirakçıların çoxsaylı suallarını cavablandırıb. Onların içində ən əhəmiyyətlisi 1993-cü ildə BMT Təhlükəsizlik Şurasının Ermənistan-Azərbaycan Dağlıq Qarabağ münaqişəsinin həllinə dair qəbul etdiyi 4 qətnaməyə uyğun olaraq BMT-nin fəaliyyəti barədə verilən sual olub. Qətnamələrdə deyilir ki, Dağlıq Qarabağ Azərbaycanın ayrılmaz tərkib hissəsidir və işğalçı qüvvələrin işğal olunmuş ərazilərdən dərhal, tam və qeyd-şərtsiz çıxarılmasına dair tələb irəli sürülür. Buna baxmayaraq, Ermənistan bu şərtləri hələ də yerinə yetirməyib.
Miroslav Layçak təəssüflə bildirib ki, BMT Təhlükəsizlik Şurasının qətnamələrinin heç də hamısı icra olunmur.
"Biz BMT Təhlükəsizlik Şurasının qətnamələrinin yerinə yetirilmədiyi hallarda tolerant olmalıyıq. Biz qətnamələrə məhəl qoyulmaması hallarının getdikcə daha da azaldıması üçün işləməliyik", deyə Layçak qeyd edib.
"Mən bilirəm ki, Dağlıq Qarabağ münaqişəsi ətrafında yaranmış vəziyyət Azərbaycan üçün çox ağrılıdır. Əsas məsuliyyət ATƏT-in Minsk qrupunun üzərinə düşür, ancaq, hələ də bir nəticə görmürük. Buna görə də, ATƏT-in Minsk qrupunun daha səmərəli biriylə əvəz olunması və ya əksinə, qrupu daha səmərəli işə cəlb etməmiz lazım olduğunu müəyyən etmək vacibdir", o deyib. Miroslav Layçak həmçinin, tərəflər istədiyi təqdirdə BMT-nin həll prosesinə daxil olmağa hazır olduğunu vurğulayıb.
Qeyd edək ki, BMT Baş Assambleyasının 72-ci iclasının sədri Miroslav Layçak 5 və 6 aprel tarixlərində Bakıda keçiriləcək Qoşulmama Hərəkatı çərçivəsində xarici işlər nazirlərinin aralıq konfransında iştirak etmək üçün Azərbaycanda rəsmi səfərdədir.
