Azərbaycanda kərə yağına olan tələbatı daxili istehsal hesabına təmin etmək mümkün olmadığı üçün hər il onlarla xarici ölkədən kərə yağı idxal ediir. Yeniavaz.com Dövlət Statistika Komitəsindən açılqanan məlumatlara istinadən bildirir ki, yola saldığımız 2017-ci ildə Azərbaycana əsasən Yeni Zelandiya, Ukrayna, Belarus, Almaniya, Fransa, Belçika və digər ölkələrdən kərə yağı idxal olunub. İdxal olunan kərə yağının böyük əksəriyyəti Yeni Zelandiyadan gətirilib. Ötən il ərzində Yeni Zelandiyadan 7 min 953,25 ton kərə yağı idxal olunub və bu miqdarda kərə yağı üçün 36 milyon 450,88 min dollar vəsait ödənilib. Bu isə o deməkdir ki, Yeni Zelandiyadan ölkəyə gətirilən kərə yağının 1 kiloqramının gömrük dəyəri 4,6 dollara (7,8 manat) bərabər olub. Bundan başqa il ərzində Ukraynadan 706 ton, Belarusdan 495 ton, Almaniyadan 404 ton, Fransadan 328 ton, Belçikadan 195 ton, Rusiyadan 93 ton kərə yağı idxal edilib. İdxal edilən kərə yağları arasında ən ucuzu Rusiyadan, ən bahalısı isə İngiltərədən gətirilib. Rusiya kərə yağının 1 kiloqramı 1,9 dollar (3,2 manat), İngiltərə kərə yağının 1 kiloqramı isə 7,9 dollar (13,4 manat) təşkil edib. Məlumat üçün onu da qeyd edək ki, Azərbaycan kərə yağı idxalı ilə bərabər həm də kərə yağı ixrac edib. 2017-ci il ərzində Azərbaycandan Rusiyaya 1 kiloqramının gömrük dəyəri 4,3 dollar (7,3 manat) olmaqla 426 ton kərə yağı ixrac olunub.
Azərbaycana idxal edilən kərə yağının ölkələr üzrə miqdarı və qiyməti:
Məlumat üçün onu da bildirək ki, dünya bazarlarında kərə yağının qiyməti yenidən yüksəlişə keçib. Bu ilin yanvar ayının ilk günlərində dünya bazarlarında kərə yağının 1 tonunun orta qiyməti 4500 dollar (1 kq - 4,5 dollar/7,6 manat) olduğu halda, aprel ayının əvvəlində kərə yağının 1 tonu 5500 dollara (1 kq - 5,5 dollar/9,3 manat) kimi bahalanıb.
