Yaponiyanın "Fuji Optical" şirkətinin Azərbaycana görmə qabiliyyətinin yaxşılaşdırılmasına yardım missiyalarının 15 illiyinin qeyd olunması məqsədilə bu gün Bakıda tədbir keçirilib. Tədbirdə yüksək vəzifəli dövlət məmurları, millət vəkilləri, həmçinin BMT-nin və digər beynəlxalq təşkilatların, vətəndaş cəmiyyəti və mətbuat nümayəndələri iştirak edib.
Baş nazirin müavini Əli Həsənov, BMT-nin Rezident Əlaqələndiricisi Qulam İshaqzai, Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev, Yaponiyanın Azərbaycandakı səfiri Teruyuki Katori və "Fuji Optical" şirkətinin rəhbəri Doktor Akio Kanai BMT QAK-ın təşkil etdiyi tədbirdə çıxış ediblər.
"Bu gün Yaponiya-Azərbaycan əlaqələri çox yüksək səviyyədədir. Azərbaycan Prezidenti də bu əlaqələrin inkişafına xüsusi diqqət göstərir".
Eurasia Diary-nin məlumatına görə, bunu Baş nazirin müavini, Beynəlxalq Humanitar Yardım üzrə Respublika Komissiyasının sədri Əli Həsənov deyib. Onun sözlərinə görə, Azərbaycan qısa müddətdə inkişaf edib, bu gün dünya ölkələrinin diqqəti ölkəmizə yönəlib. Ə.Həsənov qeyd edib ki, “Fuji Optical” şirkəti Azərbaycan hökumətinin razılığı ilə 2005-ci ildən məcburi köçkünlərin və aztəminatlı insanların görmə qabiliyyətinin yaxşılaşdırılması üçün təmənnasız müayinələr aparır:
"1990-cı illərin əvvəllərində ulu öndər Heydər Əliyevin dəstəyi ilə humanitar təşkilatlar ölkəmizə gəlməsəydi, Azərbaycanda humanitar böhran olardı. Yaponiya tərəfindən Azərbaycanda çox sayda humanitar layihələr həyata keçirilib. Yaponiya hökuməti vasitəsilə Azərbaycana güzəştli kreditlər verilib".
Baş nazirin müavini yapon xalqının yüksək mədəniyyətə sahib olduğunu da söyləyib.
Yaponiyanın Azərbaycandakı fövqəladə və səlahiyyətli səfiri Tereyuki Katori humanitar missiyanın 15 illiyinin qeyd edilməsinin qürurverici olduğunu deyib.
"Biz özəl şirkətləri məcburi köçkün və qaçqınların sosial rifahının yaxşılaşdırılması istiqamətində bir çox layihələr həyata keçirməyə dəvət edirik", deyə Yaponiyanın Azərbaycandakı səfiri Teruyuki Katori bildirib.
"Bu gün yapon xalqı üçün qürurlu bir gündür. "Fuji Optical" uğurlu bir şirkətdir. Çünki bu şirkət işlədiyi ölkələrə çox böyük dəyər gətirir. Biz məcburi köçkünlərin yaşayışının yaxşılaşdırılması üçün böyük layihələr həyata keçirmişik. Sığınacaqların tikilməsi qəsəbələrin salınması və s. işlər görmüşük. Ötən il Yaponiyanın Xarici İşlər nazirinin Azərbaycana səfəri hər iki dövlətin əlaqələrinin yeni mərhələsinə qədəm qoydu".
BMT-nin Azərbaycandakı rezident əlaqələndiricisi Qulam İshaqzai "Fuji Optical" şirkətinin Azərbaycanda həyata keçirdiyi humanitar missiyalara 2,8 milyon dollardan çox vəsait xərcləndiyini deyib. Əlavə edib ki, 1992-ci ildən etibarən BMT QAK Azərbaycana humanitar yardımlar edir. Humanitar yardımlar davamlı inkişaf məqsədlərinə nail olmaq üçün böyük əhəmiyyət kəsb edir.
Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev Ermənistanın etnik təmizləmə siyasəti nəticəsində bir milyondan çox soydaşımızın öz yurd-yuvalarından didərgin salındığını deyib. O, Azərbaycanın çətin günlərində ona yardım edən hər bir ölkə və təşkilata, o cümlədən Yaponiyanın "Fuji Optical" şirkətinə minnətdarlığını bildirib.
"Fuji Optical" şirkətinin rəhbəri Akio Kanai yenidən Azərbaycanda olmaqdan məmnunluğunu ifadə edib. O, səhhəti imkan verdikcə bu aksiyanı davam etdirəcəyini deyib. A.Kanai missiyanın ərsəyə gəlməsində köməyi olan hər kəsə, o cümlədən qonaqpərvərliyə görə Azərbaycan hökumətinə və xalqına minnətdarlığını bildirib.
BMT QAK milli hökumət qurumları ilə əmədaşlıq şəraitində dünyada olan qaçqınların və məcburi köçkünlərin himayəsi və rifahı üçün beynəlxalq müdaxilələrin idarə olunması və əlaqələndirilməsi vəzifəsini daşıyır. Təşkilat məlumatlılığın artırılmasına və didərginlik problemləri həllini tapana qədər Azərbaycandakı didərgin insanlara dəstək göstərilməsi üçün bütün təşəbbüslərə şərait yaratmağı qarşısına məqsəd qoyub.
.jpeg)
