Banqladeşli tanınmış jurnalist Məhəmməd Cahangir vəfat edib.
Eurasia Diary xəbər verir ki, Beynəlxalq Avrasiya Mətbuat Fondunun (BAMF) prezidenti Umud Mirzəyev tanınmış jurnalistin vəfatı ilə əlaqədar başsağlığı verib:
"İki gün öncə Frankfurtda səfərdə olarkən Banqladeşin mədəni-ictimai həyatında yaxından iştirak edən tanınmış jurnalist, dəyərli dostumuz Məhəmməd Cahangirin vəfat etməsi ilə bağlı oğlu Apurba Cahangirdən sarsıdıcı xəbər aldım: “Hörmətli cənab Umud, üzülərək sizə atam, sizin dostunuz və Dr. Məhəmməd Yunusun qardaşı Məhəmməd Cahangirin bir neçə gün əvvəl vəfat etməsi xəbərini çatdırıram. Son günlərinə qədər o, planlaşdırdığımız kimi Bakıya gəlmək istəyirdi, amma qismət olmadı. Xahiş edirəm onun ruhu üçün dua edin və bizlə əlaqəni kəsməyin.”"
U.Mirzəyev bildirib ki, Məhəmməd Cahangir ölkəsini, millətini sevən, dostluğa böyük önəm verən bir şəxsiyyət, dinindən və irqindən asılı olmayaraq, bütün bəşəri dəyərləri uca tutan, gözəl ziyalı, tanınmış yazıçı, jurnalist idi:
"Onun Banqladeş və müxtəlif ölkələrin media cameəsində jurnalistikanın tədrisi, media xəbərlərinin hazırlanması, media idarəçiliyi, tele-radio yayımçılığı sahəsində ciddi dəst-xətti vardı. 1976-cı ildən Banqladeşin tanınmış televiziya proqramlarının aparıcısı və müəllifi, jurnalistika sahəsində 15-dən çox nəşrin müəllifi olan Məhəmməd Cahangirin gənc nəslin formalaşdırılmasındakı əməyi, göstərdiyi səylər heç vaxt unudulmayacaq. Azərbaycana səfər etmək, dostlarla bir arada olmaq istəyini reallaşdırmaq istəsək də, taleyi buna imkan vermədi. Onun yoxluğunu Banqladeş cameəsi, mədəni-ictimai həyatı və onu sevən dostları üçün ciddi itki hesab edirəm. Yaxınlarına, dostlarına, ailəsinə, şəxsən Apurba Cahangirə və dəyərli dostumuz Dr. Məhəmməd Yunusa dərin hüznlə baş sağlığı verirəm. Allah rəhmət eləsin!".