“Azərbaycanda Həsən bəy Zərdabi, Nəcəf bəy Vəzirov, Mirzə Fətəli Axundov, Seyid Əzim Şirvani, Əsgər ağa Govani kimi ziyalılar o dövrdə mətbuatın yaradılmasına ehtiyac olduğunu anlayırdılar. Zərdabi Rusiyanın ən tanınmış universitetlərində təhsil almışdı, Rusiyanın maarifçilik ideologiyasını yayanlarla əlaqələri vardı. O, 1875-ci ildə “Əkinçi”nin yaradılması üçün üç il mücadilə apardı. Çar Rusiyası dövründə  yalnız siyasətə qarışmayan, maarifçilik ideyalarını təbliğ edən bir qəzetin nəşrinə icazə verilə bilərdi. İlk mətbuatın yaranmasında əlifba problemi, çap mətbəəsi, eləcə də bu sahədə mütəxəssislərin olmaması çətinliklər yaradırdı. “Əkinçi” nəşr olunan müddətdə 52 nömrəsi öz aktuallığı ilə yadda qaldı. Onun nüsxələri Türkiyəyə, Rusiyanın ucqar ərazilərinə, Şərq ölkələrinə, Avropa ölkələrinə yayılmaqda idi”.

Bunu Eurasia Diary-ə Beynəlxalq Mətbuat İnstitunun Azərbaycan Milli Komitəsinin rəhbəri, Azərbaycan Mətbuat Şurasının sədr müavini Umud Rəhimoğlu 22 iyul Milli Mətbuat Günü münasibətilə fikirlərini bölüşərkən deyib.

U.Rəhimoğlu qeyd edib ki, XIX sonu XX əsrin əvvəlində çox sayda mətbu nəşrlər fəaliyyətə başlayıb:

“Sovet dövründə nəşrlərin əsas məqsədi Sovet ideologiyasının təbliği idi. Bunlar “Kommunist”, “Sovet kəndi”, “Azərbaycan gəncləri”, “Bakı”, “Bakraboçiy”, özümün də çalışdığım “Ədəbiyyat və İncəsənət” qəzetləri idi.

Azərbaycan müsətəqillik əldə etdikdən sonra print media, son dövrlər isə internet media populyar olub, sosial media inkişaf edib. Müstəqillik qazandıqdan sonra Azərbaycanın müharibəyə cəlb olunması, torpaqlarımızın işğal olunması, qaçqın axınının yaranması, bir milyon insanın ehtiyac içində olması mətbuatın inkişafınana da təsir göstərirdi. Bu dövrdə “Azərbaycan”, “Aydınlıq”, “Azadlıq” qəzetləri, Xalq cəbhəsi ilə bağlı müxtəlif nəşrlər çap olunmağa başladı.

Ancaq mətbuatın inkişafı ulu öndər Heydər Əliyevin hakimiyyətə gəlişi ilə çox bağlıdır. 1998-ci ildə senzuranın ləğv olunması kimi mühüm addımlar atılmağa başladı. Kütləvi İnformasiya vasitələri ilə bağlı dövlət qurumun ləğv olunması Azərbaycan Mətbuat Şurasının yaradılması, mətbuatın liberallaşması sahəsində görülən addımlardan biri oldu. Hazırda Azərbaycanda istənilən şəxsin mətbu orqanı qeydiyyatdan keçirmək imkanı var. Konstitusiyamızla söz və ifadə azadlığı təsbit olunub”.

Umud Rəhimoğlu əlavə edib ki, 2008-ci ildə KİV-ə dövlət dəstəyi konsepsiyasının yaranması ilə bağlı ölkə prezidentinin sərəncam imzalanması dövlət tərəfindən bu sahəyə diqqətin göstəricisi idi.

“Azərbaycanda jurnalistlərin sosial problemləri vardı. Mətbuat Şurasının rəhbərliyi tərəfindən prezidentə müraciət çatdırıldı və prezident sosial sahədə addımların atılması, jurnalistlərə ev verilməsi üçün tapşırıqlar verdi.

Mən eyni zamanda Beynəlxalq Avrasiya Mətbuat Fondunun prezidentiyəm. Bizim təşkilat mətbuatın inkişafı, Azərbaycan haqqında obyektiv informasiyanın yayılmasında kifayət qədər işlər görür. Hesab edirəm ki, Azərbaycan mətbuatı verilən imkanlardan istifadə edib işğal olunmuş torpaqların azad olunması istiqamətində beynəlxalq camiədə öz fəaliyyətini gücləndirməlidir”, - deyə Umud Rəhimoğlu bildirib.

Gülnar SƏLİMOVA