2016-cı ilin aprel döyüşlərindən üç illik zaman kəsimi keçsə də, rəsmi İrəvan "Lələ təpə"də yaralanan işğalçı əsgərlərinin yarasına məlhəm ola bilmir.
Eurasia Diary moderator.az-a istinadən xəbər verir ki, bu günlərdə xaricdəki erməni diasporu və nüfuzlu ermənilərin vasitəsi ilə yeni bir kampaniyaya start verən İrəvan, bu yolla Azərbaycan torpaqlarına hücum zamanı əlini, ayağını itirən, habelə digər nahiyyələrindən ağır yara alan hərbçilərinin müalicəsinə nail olmağa, onları gərəkli protezlərlə təmin etməyə çalışır. Bu məqsədlə sosial şəbəkələrdə aprel döyüşlərində rüsvayçı məğlubiyyətə uğrayan, silahını atıb qaçan hərbçilərini “qəhrəman” kimi təqdim edən və onların fotolarını yayan İrəvan, onların hər biri üçün gərəkli olan vəsaiti də qeyd etməklə “xeyirxah insanları” bu vəsaitin toplanmasında aktiv olmağa səsləyib.
Aprel döyüşlərinin üzərindən üç il ötməsinə baxmayaraq, Ermənistanın hələ də öz yaralı əsgərlərinin müalicəsini təmin etməməsi, bu gün də bunu beynəlxalq ictimaiyyətin ümidinə buraxması, rəsmi İrəvanın həm acınacaqlı maddi durumundan, həm də öz əsgərinə olan münasibətindən xəbər verir.
Bir sözlə, vaxtiylə "Lələ təpə"yə soxulan düşmən bu gün Azərbaycan torpaqlarında itirdiyi əzaları Avropa və ABŞ-da tapmağa cəhd edir. Hansı ki, bu faktın özü özgə torpaqlarına göz dikməyin ən ibrətamiz sonluğu, ən məntiqli yekunu hesab edilə bilər.