Son 20 ildə Azərbaycan Hərbi Hava Qüvvələrinə (HHQ) məxsus 4 təyyarə, 1 hərbi helikopter qəzaya uğrayıb, 1 hərbi helikopter isə döyüşlər zamanı vurulub.

Eurasia Diary-nin “AzeriDefence”yə istinadən məlumatına görə, bu hadisələr zamanı HHQ-nin 10 pilotu həlak olub, iki pilot isə katapult etməklə sağ qalıb.

Qəzaya uğrayan təyyarələrdən ikisi MiQ-29 (bir ədəd MiQ-29UB), ikisi isə Su-25 markalı döyüş, helikopter isə Mi-17 markalı hərbi nəqliyyat helikopteri olub. 2016-cı ilin aprel ayında Ermənistan hərbçiləri tərəfindən HHQ-nə məxsus Mi-24G markalı zərbə helikopteri aşağıdan uçuş zamanı RPQ-7 tipli əl qumbaraatanı ilə vurulub.

İlk təyyarə qəzası 29 yanvar 2008-ci ildə baş verib. Xəzər dənizi üzərində – Giləzi istiqamətində təlim uçuşu zamanı HHQ-nin MiQ-29 təyyarəsi dənizə düşüb. Təyyarədə olan hər iki pilot Fəxrəddin Əsgərov və Əfqan Aslanov həlak olub. Hadisədən bir ay sonra Ə. Aslanovun nəşi tapılsa da, F.Əsgərovun nəşini tapmaq mümkün olmayıb.

4 mart 2010-cu il tarixində Tovuz rayonu ərazisində təlim uçuşu zamanı qəzya uğrayan Su-25 təyyarəsinin pilotu Famil Məmmədli həlak olub.

3 fevral 2011-ci ildə Kürdəmirdə təlim uçuşu zamanı Su-25UB markalı təyyarə qəzaya uğrayıb. Pilot Zaur Yusifli və köməkçisi katapult edərək xilas ola bilib.

11 fevral 2013-cü il tarixində HHQ-nin Mi-17 markalı hərbi nəqliyyat helikopteri Şıx qəsəbəsi yaxınlığında dənizə düşüb. Helikopterin pilotları Yaşar Rüstəmov, Rüstəm Rüstəmov və Bəhruz Zeynalov həlak olub.

2 aprel 2016-cı il tarixində cəbhənin Füzuli rayonu istiqamətində düşmən tərəfindən Mi-24G tipli döyüş helikopterinin vurulması nəticəsində helikopterin pilotları – Urfan Vəlizadə, Təbriz Mustafazadə və Bəkir İsmayılov şəhid olub.

Son olaraq 24 iyul 2019-cu il tarixində Xəzər dənizi üzərində MiQ-29 döyüş təyyarəsinin qəzaya uğraması nəticəsində pilot Rəşad Atakişiyev həlak olub.

HHQ ilə yanaşı bu dövrdə AZAL-a məxsus bir ədəd “Cessna” tipli təlim, bir ədəd İl-76 tipli nəqliyyat təyyarəsi (Əfqanıstan səmasında qəzaya uğrayıb), 1 ədəd Mi-8MTV və bir ədəd Mi-8T nəqliyyat helikopteri Xəzər dənizi üzərində qəzaya uğrayıb. Helikopter qəzalarında ümumilikdə 8 nəfər ölüb.