Böyük mütəfəkkir Əhməd bəy Ağaoğlunun 150 illik yubileyi ilə əlaqədar olaraq, Azərbaycan İlahiyyat İnstitutu (Aİİ), Türk Ocaqları İstanbul şöbəsi, İstanbul Universiteti Türkiyat Araşdırmaları İnstitutu, Türk Əməkdaşlıq və Koordinasiya Agentliyinin (TİKA) birgə təşkilatçılığı ilə “Türk dünyasının görkəmli ictimai-siyasi xadimi – Əhməd bəy Ağaoğlu” mövzusunda ikigünlük elmi konfrans keçirilib. 

 

Eurasia Diary xəbər verir ki, konfransda çıxış edən millət vəkili Qənirə Paşayeva Əhməd bəy Ağaoğlunun həyat və fəaliyyətindən, apardığı milli mücadilənin müxtəlif istiqamətlərindən, onun bir alim, hüquqşünas, millət fədaisi olmasından, türk birliyi və müstəqilliyi müdafiə etməsi kimi məsələlərdən söz açıb. Deputat qeyd edib ki, Əhməd bəy Ağaoğlu milli oyanış hərəkatının daim ön sıralarında dayanan vətənpərvər şəxsiyyət, eyni zamanda, müsəlman Şərqində müasirləşmə siyasətinin ardıcıl tərəfdarı kimi tanınıb.

"Əhməd bəy Ağaoğlu Azərbaycanın yetişdirdiyi böyük şəxsiyyətlərdən biridir. Türk dünyasının ziyalıları və görkəmli şəxsiyyətləri arasında Əhməd bəy Ağaoğlu xüsusi yeri olan bir fikir adamıdır. O, Türkiyə və Türk dünyası üçün böyük fədakarlıqlar edib. Əhməd bəy Ağaoğlu gənclər üçün əsl örnəkdir. Bütün gənclər onu anmaqdan başqa anlamağı, bunun üçün isə tariximizi, böyük tarixi şəxsiyyətlərimizi dərindən öyrənməlidir. Əhməd bəy Ağaoğlu bütün Türk dünyası üçün böyük işlər görmüş böyük bir şəxsiyyətdir və harada doğulub harada yaşamasından asılı olmayaraq bütün Türk gənclərinin Əhməd bəy Ağaoğlunu yaxından tanımasına, ondan öyrənməsinə bu gün də, gələcəkdə də böyük ehtiyac olacaq. Onun fikirləri Türk dünyasının birliyi və inkişafına çağırır və gənclərimiz üçün ən gözəl örnəklərdən biridir və bu cür tədbirlər Əhməd bəy Ağaoğlunu gənc nəsillərə daha geniş tanıtmağa xidmət edir və mən təşkilatçıların hamısına təşəkkürümü bildirirəm. Özəlliklə Əhməd Ağaoğlunun 150 illik yubileyinin keçirilməsi, onun irsinin öyrənilməsi, daha geniş tanıdılması istiqamətində dövlət başçımız İlham Əliyevin sərəncamını yüksək qiymətləndirir və cənab Prezidentə təşəkkürümüzü bildirirəm. İnanıram ki, Azərbaycan, Türkiyə və Türk dünyası aydınları, Əhməd Ağaoğlunun gənc nəsillərimizə daha yaxından tanıdılmasında fəallıqlarını daha da artıracaqlar və bu cür tədbirlərin sayı daha da artacaq”, - deyə Q.Paşayeva bildirib. 

Millət vəkili Türk Ocaqlarının nümayəndələrinə müraciətlə "Əhməd Ağaoğlunun Türk Ocaqlarının qurucularından biri idi və  çox yaxşı olar ki qardaş Türkiyədə onun adına bir küçə və ya park olsun və həm Türkiyədə, həm də Azərbaycanda abidəsinin olması da çox vacibdir" deyib: "İnanıram ki, Türk Ocaqlarının qardaş Türkiyənin rəsmi qurumlarına müraciəti ilə Əhməd Ağaoğlunun 150 illik yubileyinin keçirildiyi bu il içərisində Türkiyədə də onun adının əbədiləşdirilməsi  istiqamətində önəmli addımlar atılacaq".

Türk Ocaqları rəsmiləri Q.Paşayevanın təklifini müsbət dəyərləndiriblər və bununla bağlı Türk Ocaqlarının adından rəsmi qurumlara müraciətlər göndərəcəklərini deyiblər.

Qeyd edək ki, konfransada 20-dən çox məruzəçinin məruzəsi 6 paneldə dinlənilib.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan