“İstehlak Malları və Xidmətləri sahəsində Maarifləndirmə İctimai Birliyi” tərəfindən Azərbaycan Respublikası Prezidenti yanında QHT-lərə Dövlət Dəstəyi Fondunun maliyyə dəstəyi ilə həyata keçirilən “Sağlamlığımızı və Ətraf Mühiti qoruyaq!”adlı layihənin icrasına yekun vurulub.
Eurasia Diary-nin verdiyi xəbərə görə, layihə çərçivəsində Nəsimi, Sabunçu, Yasamal rayonları ərazisində yerləşən məktəblərdə təhsil alan şagirdlərə sağlam qida, plastik qabların zərəri, ekoloji təmiz məhsullar haqda ətraflı məlumatlar verilib. Bununla yanaşı Ətraf Mühiti qoruyaq təmizlik aksiyası çərçivəsində Yasamal rayonunun Alatava qəsəbələrində və Yeni Yasamal ərazisində təmizlik aksiyası keçirilib, maarifləndirmə materialları sakinlər arasında paylanılıb. Layihənin sonu olaraq sosial çarx hazırlanaraq geniş ictimaiyyətə çatdırılıb. Sosial çarxda müxtəlif ekspertlərin və ictimai xadimlərin sağlam qida, plastik qabların ətraf mühitə vurduğu ziyan ictimaiyyətin diqqətinə çatdırılıb. Təşkilatın rəhbəri və layihənin icraçısı Bəybala İsmayılovun fikrincə ekologiyanın, ətraf mühitin qorunması ilə bağlı tədbirlərdə insanlarımızın daha çox iştirakı təmin edilməlidir. Maarifləndirmə işləri aparılmalıdır. O, belə layihələrin regionlarda yerinə yetirilməsi, insanın ekoloji təmiz mühitə adaptasiyasının gerçəkləşdirilməsi üçün ekoloji layihələrin əhəmiyyətinə toxunub.