Son illərdə Azərbaycanın Avropada yerləşən müxtəlif ölkələrdəki diaspora təşkilatlarının fəaliyyətləri daha da genışlənməkdədir. Bunun bariz nümunəsi kimi Niderland krallığının Haaqa şəhərində yerləşən Hollanda Azərbaycan Türk Kültür dərnəyinin son vaxtlar gördüyü işləri misal göstərmək olar. Xatırladaq ki, adı çəkilən təşkilatın təşəbbüsü və təşkilatçılığı, həmçinin orada yaşayan azərbaycan- türk toplumunun maliyyə yardımı ilə 2007- ci ildə Haaqa şəhərinin Nieuw Eykenduynen məzarlığında Xocalı soyqırımı qurbanlarının xatirəsənə anıt ucaldılmışdır. Əgər nəzərə alsaq ki, Haaqa şəhəri Avropanın ən böyük siyasi mərkəzlərindən biridir, anıtın məhz həmin şəhərdə olmasının əhəmiyyəti daha da aydın olar. Hər il fevral ayının 28- də orada yaşayan soydaşlarımız anıtın ətrafına toplaşaraq ermənilərin törətdiyi soyqırımın qurbanlarının xatirəsini yad edir, Xocalı gerçəkliklərini bir daha oradan bütün dünyaya bəyan edirlər.
Dərnəyin şəhər bələdiyyəsi ilə apardığı danışıqların nəticəsi olaraq bu ilin iyul-avqust aylarında həmin anıt üçün yeni daha geniş yer alınmış, anıt həmin yeni əraziyə köçürülərək, ətrafı tamamilə abadlaşdırılmışdır. İndi orada daha çox ziyarətçinin eyni vaxta toplanması və müəyyən tədbirlərin keçirilməsi üçün hər cür müasir şərait yaradılmışdır. Bundan başqa üzərində baş vermiş hadisənin qısa izahatı olan lövhə həm azərbaycan, həm də holland dilində ziyarətçilərə məlumat verir. Həm də yeni ərazi gəliş - gediş baxımından da insanlar üçün çox münasib bir yerdədir. Bu işdə maliyyə baxımından zəhməti keçən Azərbaycan ve Türk toplumuna təşəkkür edirik!
