Ermənistan cəbhədəki məğlubiyyətlərini ört-basdır etmək üçün Azərbaycanın dinc əhalisini və mülki yaşayış məntəqələrini atəşə tutur.

Eurasia Diary bu hadisələr zamanı həmin rayonlara baş çəkən və zərərçəkmiş şəxslərlə söhbət aparan sosioloq Zəminə Səfərovanın təəsüratlarını öyrənib.

Sosioloq bildirdi, bu ağrılı hadisələr ondan da yan keçməyib: “Bu hadisələr zamanı bizim də şəhidlərimiz oldu. Onların dəfn mərasimlərində iştirak etdik. Füzulidə olanda çox qürurlandım. Cəbhə xəttinə yaxın kəndlərdə yaşayan əhali heç nədən qorxub çəkinmir. Sual verəndə ki, nə əcəb qorxmursuz və kənddən çıxmırsız, dedilər ki, biz ermənilərdən qorxmuruq. Kənd əhalisi deyirdi ki, təki zərbələr bizə dəysin, əsgərimizə yox, qoy onlar qələbə qazansın".

Müsahibimiz ermənilərin İyul təxribatından sonra iki dəfə Tovuzda olub və Gəncə hadisələrindən sonra isə Bərdəyə gedib: “Bərdədə Tərtərdən gələn qaçqın və köçkünlər, doğma yurdundan didərgin düşən insanlar məskunlaşıb. Bilirsiniz ki, Tərtərdə onlar üçün qəsəbə salınmışdı. İndi buranın erməni silahlı qüvvələri tərəfindən hər gün ağır artilleriya atəşinə məruz qalması ilə onlar artıq ikinci dəfə qaçqın düşmüş oldular. Düzdür, yenə də öz torpağımızdadırlar. Ancaq ikinci dəfə aldıqları stress, zərbə və travmanın təsirindən uzun illər qurtula bilməyəcəklər”.

Onun sözlərinə görə, Tərtərdə demək olar ki, salamat ev qalmayıb: “Gənclərimizin, yaşlı insanların və uşaqlarımızın gələcəyini düşündükcə doğrudan da Gəncə və Tərtərdə yaşananlar insanlıq faciəsidir. Mən onlarla görüşəndə üz ifadələrindən oxuyurdum ki, həyatda bircə ümidləri var. O da torpaqlar qayıtsın, bəlkə onda yaşadıqları bu travma bir az yumşala və bir az təskinlik tapalar ki, torpağımızdayıq. Şükürlər olsun ki, hər birində böyük ruh yüksəkliyi var. Mən özüm də Füzulidənəm və eyni hissləri yaşayıram. Hər birimizdə ümid var ki, torpaqlarımız qayıdacaq. Hər bir azərbaycanlı bu ümidlə yaşıyır. O gün çox uzaqda deyil. Həmin gün ürəkdən şadlanacayıq. Hələ ki, yarımçıqdır hər şey. Arzu edirəm ki, şəhid analarının axan göz yaşları sevinc göz yaşlarına dönsün. Onların təskinliyi də o olacaq ki, şəhidlərinin ruhları sevinir. Hər bir şəhid anası bilsin ki, övladları tək onların deyil, bütöv Azərbaycanın övladlarıdır”.

Hazırda erməni terrorundan zərərçəkmiş rayonlarda vəziyyət dövlətin tam nəzarəti altındadır. Cənab Prezidentin də dediyi kimi şəhər tam şəkildə bərpa ediləcək. Cənab Prezidentimiz Ali Baş Komandan İlham Əliyevə böyük rəğbətimiz, ümidimiz yarandı. Ölkə rəhbəri danışanda nəinki əhali, ordumuz da cəsarətlənir. Prezidentimiz gördü ki, xalq ona arxalanıb. “Böyük dayaq” filmində deyildiyi kimi, "Arxası xalq olanın başı göylərə ucalar". Güc birlikdədir. Allah ordumuzu və prezidentimizi qorusun!

Ülvi Əhmədli