Mətbuat cəmiyyət üçün informasiyanın əsas mənbəyi hesab edilir. Mətbuat işçiləri bütün istiqamətlərdə və ən ağır şəraitlərdə belə cəmiyyəti məlumatlandırmaq üçün fəaliyyət göstərirlər. Təəsüflər olsun ki, bəzən onlar müəyyən maraq qruplarının hədəfinə tuş gəlirlər. Bunun nəticəsidir ki, jurnalistika ən təhlükəli peşələr sırasına daxil olub. Jurnalistlər göstərdikləri fəaliyyətlərinə görə təqiblərə, həbslərə və bəzən də qətllərə məruz qalırlar.

Bu xüsusda əziyyət çəkən jurnalistlərdən biri də Əl-Cəzirə media şəbəkəsinin nümayəndəsi, xəbər prodüseri olan Mahmud Hüseyindir. O, hal-hazırda Misir tərəfindən müxtəlif ittihamlarla heç bir hökm və məhkəmə qərarı olmadan saxlanılıb. Hüseynə qarşı edilən bu addım beynəlxalq hüquq və hətta Misir qanunlarına da ziddir. Artıq 1400 gündür ki, Mahmud Hüseyin həbsdədir.

Qeyd edək ki, o, ailəsini ziyarət etmək üçün Misirə gəldiyi zaman həbs edilib. Misir hökuməti Mahmud Hüseyni dövlət qurumlarına qarşı yalan məlumatlar paylaşaraq xaos yaratmaqda ittiham edib. Misir mətbuatı onu terrorist və dövlət düşməni kimi təqdim edib. 2016-cı il 23 Dekabrda həbs edilən Hüseynin həbsdə olduğu müddət artıq 1400 günü haqlayıb.

Beynəlxalq Avrasiya Mətbuat Fondu hər zaman jurnalistlərin təhlükəsizliyini müdafiə edib və onların üzləşdiyi qanunsuzluqlara qarşı mövqe nümayiş edib. Əl-Cəzirənin nümayəndəsi həbs edildiyi zaman, BAMF öz platformasından istifadə edərək yaranmış xoşagəlməz vəziyyətə adekvat reaksiya bildirib. Beləki, BAMF-nin təşəbbüsü ilə yaradılmış “Eurasia Diary” analitik portalı Mahmud Hüseynin qanunsuz həbsi ilə əlaqədar bir sıra informativ məqalələr yayınlayaraq vəziyyəti öz oxuyucularına çatdırıb.

Bu hadisə sadəcə bir jurnalistə qarşı edilmiş qanunsuzluq kimi dəyərləndirilməməlidir, bu ümumilikdə beynəlxalq mətbuata kölgə salan addımdır. Dünya ölkələri və əlaqədar qurumlar bu işdə həmrəylik göstərməli və Mahmud Hüseyinin həbsdən azad olunmasına, işinə və ailəsinə geri dönməsinə nail olmalıdır.

BAMF beynəlxalq hüquqa zidd olan baş verən hadisəni qınayır və ümid edir ki, Misir hökumətinin müvafiq orqanları bu barədə ədalətli qərar qəbul edəcəklər.