"TRT Beynəlxalq Yayım Agentliyi" 44 gün davam edən İkinci Qarabağ müharibəsi ilə bağlı sənədli film hazırlayıb.
Eurasia Diary-nin verdiyi məlumata görə, TRT-nin jurnalisti Oubay Şahbandar Azərbaycanın işğaldan azad edilmiş rayonlarına - Ağdam, Füzuli və Hadrut, habelə ermənilər tərəfindən raket zərbələrinə məruz qalmış Gəncə və Bərdə şəhərlərinə səfər edib.
Səfər zamanı Şahbandar hərbiçilərdən və Azərbaycan hökumətinin səlahiyyətlilərindən, eləcə də erməni təcavüzündən əziyyət çəkən mülki şəxslərdən müsahibə alıb.
Sənədli filmdə Qarabağın keçmişdə işğal altında olan bölgələrində, xüsusilə Füzuli və Ağdam şəhərlərində törədilmiş erməni vandalizmindən bəhs edilir.
Bildirilir ki, Azərbaycanın bu rayonlarının şəhər və kəndləri otuz illik işğal zamanı ermənilər tərəfindən dağıdılıb. Azərbaycan xalqına məxsus bütün tarixi və mədəniyyət abidələr məhv edilib. Hətta məscidlər və digər dini abidələr alçaldılıb.
Erməni təcavüzünü şərh edərkən Şahbandar, Azərbaycanla Ermənistan arasındakı fərqləri göstərir. Onun sözlərinə görə, Ermənistan monoetnik ölkə olduğu halda, Azərbaycan müxtəlif etnik millətlərin və dini qrupların vətənidir.
Sənədli filmdə, həmçinin Azərbaycan Silahlı Qüvvələri tərəfindən aparılan ən uğurlu hərbi əməliyyatlar və işğal altındakı dörd rayonun və Azərbaycanın Dağlıq Qarabağ bölgəsinin bir sıra bölgələrinin azad edilməsi zamanı döyüşlərdə Türkiyə və İsrail istehsalı olan pilotsuz təyyarələrin və digər müasir silahların istifadəsinə toxunulub.
Eurasia Diary videonu təqdim edir: