Azərbaycan Respublikasının Prezidenti İlham Əliyev mayın 10-da Naxçıvan Muxtar Respublikasına səfəri çərçivəsində bir çox görülən işlərlə tanış olub.
Eurasia Diary xəbər verir ki, Prezident ilk olaraq Naxçıvan Beynəlxalq Hava Limanının yeni uçuş-enmə zolağının təqdimatında iştirak edib.
Dövlət başçısına yeni uçuş-enmə zolağı ilə bağlı görülən işlər barədə məlumat verilib.
Azərbaycan Respublikasının Prezidenti İlham Əliyev xalqımızın ümummilli lideri Heydər Əliyevin Naxçıvan şəhərinin mərkəzində ucaldılan abidəsini ziyarət edib.
Dövlət başçısı abidənin önünə gül dəstəsi qoyub, Ulu Öndərin xatirəsini ehtiramla yad edib.
Prezident Naxçıvan şəhərində “ASAN xidmət” Mərkəzinin binasının tikintisi ilə tanış olub və “Azərxalça” Açıq Səhmdar Cəmiyyətinin Naxçıvan filialının açılışında iştirak edib
Naxçıvan Muxtar Respublikası Ali Məclisinin Sədri Vasif Talıbov dövlətimizin başçısına görülən işlər barədə məlumat verib.
Daha sonra Naxçıvan Qarnizonu Mərkəzi Hospitalının açılışı olub. Azərbaycan Respublikasının Ali Baş Komandanı İlham Əliyev açılışda iştirak edib.
Əlahiddə Ümumqoşun Ordu komandanı, general-polkovnik Kərəm Mustafayev dövlət başçısına raport verib.
Naxçıvan Muxtar Respublikası Ali Məclisinin sədri Prezident İlham Əliyevə hospital barədə məlumat verib.
İlham Əliyev Naxçıvan Muxtar Respublikasına səfəri çərçivəsində Süni Mayalanma Mərkəzinin açılışında iştirak edib və görülən işlər barədə məlumat alıb.
Dövlət başçısı Culfa-Ordubad magistral avtomobil yolunun açılışında iştirak edib. Vasif Talıbov dövlət başçısına yolun texniki göstəriciləri barədə məlumat verib.
Daha sonra Azərbaycan Respublikasının Prezidenti Ordubad Su Elektrik Stansiyasının tikintisi ilə tanış olub.
Naxçıvan Muxtar Respublikası Ali Məclisinin Sədri Vasif Talıbov dövlət başçısına layihə ilə bağlı görülən işlər barədə məlumat verib.
Dövlət başçısı "Ordubad rayon mərkəzi və ətraf kəndlərinin içməli su təchizatı və kanalizasiya sistemlərinin yenidən qurulması” layihəsinin açılışında iştirak edib. Naxçıvan Muxtar Respublikası Ali Məclisinin sədri dövlət başçısına layihə barədə məlumat verib.
Azərbaycan Prezidenti daha sonra ictimaiyyət nümayəndələri ilə görüşüb və çıxış edib. Dövlət başçısı ulu öndər Heydər Əliyevin Ordubad şəhərindəki büstü önünə gül dəstəsi qoyub.
İlham Əliyev Ordubad dəmir yolu stansiyasında görülən işlərlə tanış olub. Vasif Talıbov dövlət başçısına stansiya barədə məlumat verib.
Azərbaycan Prezidenti İlham Əliyevin Naxçıvan Muxtar Respublikasına səfəri mayın 10-da başa çatıb.
Dövlət başçısını Naxçıvan Beynəlxalq Hava Limanında Naxçıvan Muxtar Respublikası Ali Məclisinin sədri yola salıb.