“Ümumiyyətlə, Sərhəd Qoşunları ilə jurnalistlərin münasibətləri gərgindir. Bu birinci dəfə deyil. Mən indiyə qədər şahidi olmamışam ki, bu hərəkətlərə görə Sərhəd Qoşunlarının rəhbərliyini kimsə qınasın. Ona görə də onlar bunu təkrar edirlər”.
Bunu "Yeni Nəsil" Jurnalistlər Birliyinin sədri Arif Əliyev Dövlət Sərhəd Xidmətinin zabiti Rövşən Cahangirovun jurnalistə hücum etməsi haqda danışarkən deyib. A.Əliyev bu məsələdə heç bir qurumun jurnalistlərə hücum etmədiyini bildirib:
“Cəzasızlıq mühitidir və ağıllarına belə yerləşdiriblər ki, bura qapalı sahədir, ona görə burda jurnalistlər onlara sual verə bilməzlər. Görünür, onlar hansı, kimlərin sərhədlərini qorumalı olduqlarını bir qədər unudurlar. Hesab edirlər ki, bura onların sahəsidir və ora heç kimi buraxmaq olmaz. Bu bir psixoloji mühitdir, illərlə yaradılır və tək o sahədə yaradılmayıb. Hansı sahəni götürürsünüz götürün, lap ən aşağı olan səhiyyə sahəsidir və jurnalistlər informasiya almaqda o cür çətinlik çəkirlər. Hər yerdə hərbi zorakılıqla dırnaqarası üzləşmirlər, bu bütün sahələrdə olan mənzərənin sadəcə hərbi formada olan təzahürüdür. Mənə elə gəlir ki, bu ayrı-ayrı şəxslərin, nazirliyin səviyyəsində yox, ümumiyyətlə, dövlət rəhbərliyi, dövlət səviyyəsində müzakirə olunub birdəfəlik qiyməti veriləsi hadisədir.
Onlar bütün bu sahəni öz fərdi fermaları, sahələri kimi hesab edirlər. Buna isə başqaları susurlar və nə qədər ki, susacaqlar onlar özlərini daha da bax, bu cür qanundan və həyadan kənar aparmaqda davam edəcəklər. Təəssüf ki, bizim də gücümüz ictimai qınağa, həmrəyliyə çatır ki, onu nümayiş etdirək, göstərək ki, jurnalist də tək deyil. Yəni onun arxasında başqaları dayanmırsa, hər halda biz - redaksiya, jurnalistlər olaraq dayanmağı bacararıq”.