Günümüzdə sosial şəbəkələrdə insanları təhqir etmək nə qədər acı səslənsə də adi hal alıb.
“Səhər yuxudan qalxanda ayağını səhv qoyan”, həyatından narazı, aqressiyasını üzə çıxarmaq üçün fürsət axtaran istənilən internet istifadəçisi rahat bir şəkildə xoşuna gəlməyən paylaşıma və qeyd olunan fikrə tənqid əvəzinə təhqir edərək reaksiya verməkdən heç də çəkinmir. Çünki bu hərəkətinin cəzasız qalacağına arxayındır.
Bəs, sosial şəbəkələrdə bir-birilərini təhqir edən insanlar barəsində hansı tədbirlər görülür?
Millət vəkili Fazil Mustafa Ednews.net-ə məsələ ilə bağlı danışarkən bildirib ki, qanunvericilikdə bu məsələ ilə bağlı müəyyən maddə var. Onun sözlərinə görə, sosial şəbəkədə hər hansı bir təhqir elementləri olarsa ona dərhal reaksiya verilməlidir.
“Sadəcə bizdə bu istiqamətdə hüquq mühafizə orqanlarının ixtisaslaşmasından çox şey asılıdır. Müraciət olunmalı və həmin şəxs bunu məqsədyönlü şəkildə edirsə dərhal reaksiya verilməlidir. Məhkəmələrin də bu sahədə aktivliyi artırılmalıdır. Müraciət edən şəxslərin hüquqlarının qorunması istiqamətində lazımi addım atılmalıdır”.
Millət vəkili düşünür ki, hazırda sosial şəbəkələrdə məsuliyyətsiz insanlar formalaşıb.
“Adını bloqer, yazar, təlxək qoyaraq hamını güldürmək üçün başqasını təhqir edənlər peyda olub. Belə hallar olduqda heç bir quruma müraciət edilmir. Azərbaycanda bu qədər boşluq olan başqa sahə yoxdur. Bu məsələyə ciddi yanaşmaq lazımdır. Sosial şəbəkə öz funksional fəaliyyətindən tam uzaq bir vəziyyətdədir və bu da çox acınacaqlı haldır”.
Gülnar Səlimova