Xəbər verdiyimiz kimi, işğaldan azad edilmiş ərazilərə təşkil olunan avtobus turlarına 18 yaşdan aşağı vətəndaşlar buraxılmayacaq. Hətta bu şəxslərə azad edilmiş ərazilərə valideynlərin müşayiəti ilə də getməyə icazə verilmir.
Maraqlıdır bəs, buna səbəb nədir?
Məsələ ilə bağlı turizm ekperti Əziz Şiriyevlə aydınlıq gətirməyə çalışdıq.
O, Ednews-a açıqlamasında bildirib ki, bu təhlükəsizlik baxımından çox vacib qərardır.
“Qarabağ zonası strateji bölgədir. Həm gündəmdədir, həm də son dərəcə diqqət olunmalı həssas nöqtəmizdir. Turizm Agentliyi qərar verməzdən öncə Prezident Aparatı və digər orqanlarla bu məsələləri müzakirə edir. Amma inanmıram ki, bu uzunmüddətli olsun, çünki 18 yaşa qədər olan insanların da oranı görmək hüququ var. Çünki Azərbaycan onun torpağıdır, Qarabağ onun məmləkətidir. Çox güman ki, bu müvəqqəti qərardır və ilkin mərhələyə şamil olunacaq”.
Ekspert bildirib ki, həmin bölgələrdə xüsusi zonalar, nişanlanmış istiqamətlər var. Onun sözlərinə görə, azyaşlılar bu xəbərdarlığa məhəl qoymaya bilər və sonda faciə yaşanar.
"Məsələn, 12 yaşlı uşaq valideynin nəzarətindən çıxaraq gedib minaya düşə bilər və ya digər qəza ola bilər. Bunların hamısını sığortalamaq üçün dövlət bu addımı atır. Heç bir ərazi 100 % təmizlənməyib. Bu gün xüsusi gəziləcək yerlər - Kəlbəcərdə, Laçında digər işğal altına olan torpaqlarda ərazilər minalardan tam təmizlənməyib. Şuşanın isə, dövlət orqanı minalardan tam təmizləndiyini açıqlayıb, amma hər ehtimala qarşı yenə də ehtiyatımızı əldən verməməliyik".
Qeyd edək ki, sözügedən turlar zamanı hər bir sərnişin fərdi qəza sığortası ilə təmin edilir. Şəhərlərarası sərnişindaşımaya aid qaydalar işğaldan azad olmuş ərazilərə müntəzəm marşrut xətlərinə də şamil edilir. Belə ki, şəhərlərarası müntəzəm marşrut xətti üzrə bilet almış sərnişin avtobusa gecikdikdə və ya avtobusun yola düşməsinə 15 dəqiqədən az qalmış vaxtda gedişdən imtina etdikdə, 2 saat ərzində, xəstəlik və ya bədbəxt hadisə baş verdikdə isə müvafiq sənədi təqdim etməklə 3 gün ərzində biletin dəyərinin 25 faizini əlavə ödəməklə həmin marşrut üzrə digər avtobus reysinə dəyişə və ya biletin dəyərinin 25 faizini çıxmaqla ödənilmiş məbləği geri ala bilər.
Azad edilmiş ərazilərə təşkil olunan avtobus reyslərinə biletləri YolumuzQarabaga.az portalı vasitəsilə yalnız onlayn rejimdə almaq olar.
Gülnar Səlimova