İki aya yaxındır itkin düşən SOCAR işçisindən hələ xəbər yoxdur. Dekabrın 1-dən Neft Daşlarında itkin düşən SOCAR-ın elektrik montyoru Mürsəl Həsənəli oğlu Namazov hələki tapılmayıb.

Bu barədə SOCAR-ın İctimaiyyətlə əlaqələr və tədbirlərin təşkili idarəsinin rəis müavini İbrahim Əhmədov məlumat verib.

Onun sözlərinə görə təssüf ki, itkin neftçinin harada olması, bununla bağlı hər hansı ehtimal və məlumat yoxdur. 

İtkin neftçinin axtarış tədbirlərinə gəlincə, qurum rəsmisi qeyd edib ki, hazırda gəmilər, dalğıclar və helikopter vasitəsilə axtarışlar davam etdirilir:

“Təssüf ki, nəticə verməyib. Bütün vasitələrlə axtarışlar təbii ki, aylar və illərlə davam etdirə bilməz. Bu baxımdan hazırda helikopterlərə tapşırıq verilib ki, dənizin səthini daim nəzarətdə saxlasınlar. İnsana bənzər hər hansı iz və ya əşya aşkarlayarlarsa, xəbərdar versinlər. O zaman dənizdə gəmilər yola düşəcək”.

Qeyd edək ki, 1972-ci il təvəllüdlü Mürsəl Namazov dekabrın 1-i gecə növbəsində işləyərkən itkin düşüb. Sonuncu dəfə o, saat 05:45 radələrində iş yerində görünüb. Daha sonra Mürsəl Namazovu görən olmayıb.