Deyirlər xoşbəxt insanlar saata baxmazlar, çünki onlar üçün nə zaman, nə də xüsusi gün anlamı olur.
Sevginin günü olmaz deyirlər…
Amma insan özəl günlərinə özənir, o xüsusi günlərdə istər dünyanın ən xoşbəxt insanı olsun, istər ən bədbəxti ayrıca diqqət istəyir. Doğum günümüzü qeyd etməyi, həmin vaxt xüsusi bir diqqət görməyi istəyiriksə niyə axı “sevgililər günü” üçün özəl gün olmasın?
14 Fevral, yoxsa 30 İyun…
Azərbaycanda hər il “Milli Sevgililər Günü” olaraq, 20 Yanvar günündə ölməz sevgilərinin qətlə yetirildiyi cütlük İlham və Fərizənin toy günləri günü qeyd edilir. Sevgililər Gününə belə bir tarixin seçilməsi keçmişində zaman-zaman əsarət buxovundan yaxa qurtarmağa can atan, azadlıq yanğısı olan bu xalq üçün sanki bir rəmzi məna daşıyır. Çox təəssüf ki, bəzilərimiz hələ də bunu anlamır. Yalnız başqa xalqların dəyərlərilə yaşayıb milli kimliyini unudan manqurtlaşan insanlarımız üçün “Sevgililər Günü”nün əslində hansı tarixdə qeyd edilməsinin elə bir önəmi yoxdur.
Özünü sevməyən başqasını da sevməz. Müqəddəs Valentinin əslində kim olmasından asılı olmayaraq, Azərbaycanın azadlıq şəhidlərinin toy günü bizimçün daha azmı müqəddəsdir? Bunu xüsusilə də gənclərimiz özlərinə sual edirmi? Yox əlbəttə ki, yoxsa illərdir mətbuatda gedən təbliğata baxmayaraq, yenə 14 fevral günü əlində gül-çiçək və hədiyyə ilə sevgilisini təbrik etməyə qaçan dünyadan xəbərsiz gəncləri görməzdik.
Ədəbiyyatımızda “Leyli və Məcnun”, “Fərhad və Şirin” kimi sevgi qəhrəmanlarını qoyub, niyə axı, əcnəbinin tanımadığımız bir sevgi varlığına tapınırıq?
Fərizə və İlham sevgisi…
Sovet Rusiyasının azadlıq hərəkatını boğmaq üçün qətliamlar törətdiyi "Qanlı Yanvar" gecəsi onların sevgisinin əbədiyyətə qovuşmasının, İlham və Fərizə dastanının başlanğıcı olur…
Həmin gecə insanları qətlə yetirəcəklərini görən İlham silahsız insanlara güllə atmamaları üçün əlini qaldırıb tankın qarşısına çıxır. Onlar İlhamı da güllələyirlər. İlhama vurulan güllələr isə bir gəncin deyil, iki nəfərin qətlinə səbəb olur.
İlhamın bir zamanlar əl-ələ Fərizə ilə birgə gəzdikləri park onun əbədi məzarına çevrilir. O, bir gün Şəhidlər Xiyabanında sevdiyi qadınla - Fərizə ilə əbədi uyuyacaqdı.
Biz isə onları ziyarət edib, bir gözümüzlə onların faciəsinə ağladıqdan sonra, bir gözümüzlə “Müqəddəs Valentin Günün”də sevgilimizə hədiyyə axtaracaqdıq…
Gəlin, özümüzü sevək, özümüzə dəyər verək ki, sevgimiz də tam olsun.
Gülnar Səlimova