Xalqımızın ən sevimli və təntənəli bayramlarından biri də Novruz bayramıdır. Əslində hər kəs bayramdan çox onun adət-ənənələrini çox sevir. Həmin adət-ənənələrdən biri də küsülülərin bayramda barışmasıdır. Lap qədimdən nənə-babalarımız deyiblər ki, bayramı küsülü keçirmək olmaz. Bayramı küsülü keçirdinsə, həmin ili küsülü qalırsan. Ona görə də bayram ərəfəsində küsülülər barışır, bir-birlərinə xoş söz deyib, incikliyi aradan götürərlər.
Maraqlıdır, həmişə müxtəlif mövzularla bağlı fikirlərini öyrəndiyimiz deputat və mədəniyyət insanları kiminlə küsülüdürlər, onlar bu bayramda kiminlə barışmaq istəyərlər?
Deputat Əflatun Amaşov deyir ki, o kimləsə küsülü olmamağa çalışır:
“Ümumiyyətlə mən küsmək küsüşmək anlayışına başqa cür yanaşıram. Çalışıram ki, heç kəslə aramda küsülülük yaranmasın. Əgər kimlərsə məndən küsərsə kin saxlamaram, barışaram. Mənim yadıma düşmür ki, kimdənsə küsüm. Onu demək istəyirəm ki, əgər küsülülər varsa da bayramı bəhanə dib barışsın, küs qalmasın”.
“Barışıq böyük ürəyə sahib olmaqdı” - deyən, Azərbaycan kinosunun canlı əfsanəsi, xalq artisti Rasim Balayev isə dünyanın fani olduğunu xatırladaraq insanları barışa səslədi:
“Küsülü olduğum adam olub, təəssüf ki, indi o rəhmətə gedib. Həyatda yoxdur ki, barışam. Bəzən elə hadisələr, elə hərəkətlər olur bağışlanması mümkün olmur. Lakin yüngül şeylərin, balaca səhvlərin üstündə küsənlər var ki, onlara həyatın faniliyini xatırladıb, barışsınlar deyərdim. Qarşıdakı şəxs çox dərin iz qoymayıbsa kin saxlamasınlar elə bu bayramda barışsınlar. Həyatda çox problemlər var, bir də insanlar bir birinə problem yaratmasınlar. Barışmaq da əksiklik deyil, əksinə böyük ürək sahiblərinin işidir”.
Deputat Razi Nurullayev isə küsülü olduğu adamlarla barışmaq istəmədiyini bildirdi:
“Çox illər əvvəl mənim də həyatımda küsülü olduğum insanlar olub. İndi isə incidiyim var və ya məndən haqsız inciyən insanlar var. Onlarla o qədər də yaxın deyiləm. Ona görə də olara bir addım belə atmaq fikrim yoxdu. Çünki bəzi insanlar var ki, onlar qırmızı xətti keçir. Və qırmızı xətti keçəndən sonra geriyə yol qalmır”.
Azərbaycanın görkəmli teatr və kino aktrisası Afaq Bəşirqızı isə xarakterinin buna yol vermədidiyini, heç kəsi bağışlaya bilmədiyini açıqladı:
<img alt="Aktyordan prezident olmaz deyənlər Zelenskiyə baxsınlar" -="" afaq="" bəşirqızı="" »="" sfera.az="" azərbaycanda="" özəl="" xəbərlər,="" araşdırmalar,="" təhlillər="" və="" müsahibələrin="" tək="" ünvanı"="" data-cke-saved-src="https://sfera.az/file/pic/xeber/2022-02/1646025882_afaq125.jpg" src="https://sfera.az/file/pic/xeber/2022-02/1646025882_afaq125.jpg" style="height: 338px; width: 600px;">
“Bu zənnimcə, xarakterdən asılıdır. Amma nifrətə çevrildisə barışmaq heç cür mümkün olmur. Küs olduğum adam olur, nifrət etdiyim adam olur o da ki, ömrlükdür bağışlamaq haqqında düşünmürəm. Küs olanlara da demək istərdim ki, əgər bayram günü barışmaq lazımdırsa barışın. Nifrət, küs, intiqam yaxşı bir şey deyil”.
“Dünyanı barış xilas dəcək” - deyən, millət vəkili Aqil Abbas isə küsənlərə barışmağı tövsiyyə edib:
“Mənim heç kəslə küsüllüyüm yoxdu və düşünürəm ki, bu zəif insanlara məxsus xüsusiyyətdir. İncidiyim adamlar var, amma olarla da kin saxlamaram heç vaxt. Dünyanı yalnız barış xilas edə bilər. İstərdim ki,t əkcə adamlar yox, ölkələr barışsınlar”.
Beləliklə, məşhur incəsənət və siyasət adamlarının açıqlamalarından belə aydın olur ki, təkcə Novruzda deyil, hər zaman bağışlamaq lazımdır. Bu bəzən xarakterdən asılı olaraq dəyişsə də Aqil Abbasın da dediyi kimi dünyanı xilas edəcək yeganə məfhum məhz barışdır. Ona görə də əziz oxucu, gəlin bayramı bəhanə edib küs olduğumuz insanlarla barışaq...
Ləman Abbaslı
