Bayram tətilindən sonra insanlar üçün iş rejiminə yenidən adaptasiya olmaq müəyyən çətinlik yaradır. Üstəlik, tətilin yaz mövsümünə təsadüf etməsi hava ilə əlaqədar orqanizmdə bəzi dəyişikliyə və fiziki aktivliyin azalmasına səbəb olur.
İşə necə yenidən köklənməli?
Psixoloq Elmir Əkbər yaz və payız mövsümü insan orqanizmində həm psixi, həm də fizioloji olaraq dəyişikliklərin baş verdiyi dövr olduğunu bildirib. O, bu barədə Ednews-a açıqlamasında deyib. Onun sözlərinə görə, insanların daha çox payızdan qorxduqlarına baxmayaraq, yazda orqanizmdə dəyişikliklər daha çox özünü biruzə verir.
“Ona görə də ümumiyyətlə bütün dünyada insanlar yaz-payız mövsümü profilaktik konsultasiyalar, lazım olduqda seanslar keçirlər ki, özlərini bu dəyişikliyə hazırlaya bilsinlər. Ələlxüsus da meteohəssas insanlarda biz bu problemləri daha bariz şəkildə müşahidə edirik”.
Psixoloq vurğulayıb ki, tətildən daha səmərəli istifadə etmən insanlara işə daha tez adapatasiya olmasına kömək edir.
“Bu əsasən daha çox səyahət edən insanlarda özünü biruzə verir. İstirahət bizim üçün daha effektiv vasitədir. Yaxşı olardı ki, müddətindən asılı olmayaraq tətil bitməmişdən bir-iki gün öncə insan özü üçün yarım günlük bir iş rejimi qurmalıdır. Bu, əsasən iş rejiminə qəfil keçid zamanı yaşanan adaptasiya dövrünü daha rahat etmək üçündür. Bundan əlavə məsələn iş otağını insana daha çox xoş olan əşyalarla bəzəməlidir. Bu “smayliklər”, divarda şəkil, hansısa bitki, akvariumda balıq, qəfəsdə quş və.s ola bilər. Ümumiyyətlə, insan iş otağını özü üçün rahat, cazibədar və maraqlı etməlidir ki, işə qayıtmaq da onun üçün rahat və xoş olsun”.
Gülnar Səlimova