Xəbər verdiyimiz kimi Azərbaycanın bir neçə xəbər portalı Rusiya Federasiyasının ərazisində bloklanıb. Bunlar Oxu.az, Minval.az və Haqqın.az saytlarıdır. Maraqlıdır ki, Roskomnadzor (Rabitə, İnformasiya Texnologiyaları və Kütləvi İnformasiya Vasitələrinə Nəzarət Federal Xidməti) bu barədə saytların redaksiyalarına heç bir xəbərdarlıq ünvanlamayıb.
Xatırladaq ki, Azərbaycanın bu saytlar Rusiya Ukrayna münaqişəsi barədə obyektiv məlumatlar yayıblar. Azərbaycan tərəfi isə 44 günlük Vətən müharibəsi zamanı açıq-aşkar ermənipərəst mövqe tutan, təxribatçı informasiyalar yayan rus mediasına belə heç bir qadağa qoymayıb və informasiya azadlığına üstünlük verib.
Rusiya bu addımı hansı səbəblə atır?..
Məsələ ilə bağlı Azərbaycan İnternet Forumunun prezidenti Osman Gündüz Ednews-a açıqlaması zamanı bildirib ki, Azərbaycanın internet resurslarının, rusdilli xəbər saytlarımızın Rusiyada bloklanması tez bir zamanda bizim aidiyyatı dövlət qurumlarının marağında olacaq kifayət qədər ciddi məsələdir.
“Vətən müharibəsi zamanı bəzi Rusiya kanallarının bizim maraqlarımıza uyğun olmayan təxribatçı məlumatlar yaymaqlarına baxmayaraq onların Azərbaycanda sərbəst yayımına heç bir maneəçilik törədilmədi. Həm kabel, həm peyk televiziyaları, həm də internet resurslarına heç bir məhdudiyyət qoyulmadı. Rusiyanın aidiyyatı qurumları tərəfindən Azərbaycan resurslarının bloklanması anlaşılmazdır və qəbuledilməz bir məsələdir. Ona görə də hesab edirəm ki, bizim Xarici İşlər Nazirliyi, media qurumları, bu sahədə səlahiyyətli digər qurumlar buna təcili reaksiya verməlidirlər”.
O. Gündüz qeyd edib ki, aidiyyatı qurumlarımız Rusiya hökumətinin diqqətinə çatdırmalıdırlar ki, iki ölkə arasında mövcud olan müttəfiqlik sazişindən sonra bu cür adekvat olmayan addımlar atılırsa bu xoşagələn bir hal deyil.
“Fikrimcə, əgər bu cür bloklanmanın qarşısının alınması ilə bağlı hər hansı bir addımlar atılmazsa, onda bizdə audiovizual Şura olan Milli Teleradio Şurası dərhal Rusiya kanallarının bizim kabel televiziyası və peykdən Rusiyanın telekanallarının IPTV vasitəsilə yayımlanması məsələsinə baxmalıdır. Rusiya televiziyalarının bizim həm yerüstü, həm də peyk kanalları vasitəsilə yayımlanması məsələsi nəzərdən keçirilməlidir və aidiyyatı televiziya kanallarına Rusiyanın blok qoyması məsələsinə baxılmalıdır”.
Ekspert həmçinin əlavə edib ki, Rusiyanın özünün xəbər saytları var ki, Azərbaycanla bağlı aşağılayıcı xəbərlər dərc edirlər.
“Onların da Azərbaycan ərazisində bloklanması məsələsinə baxıla bilər. Bu məsələlərin düşünürəm ki, Rusiyanın diqqətinə çatdırılması doğru olardı”.
Məsələ ilə bağlı Rəqəmsal İnkişaf və Nəqliyyat Nazirliyinə sorğu ünvanladıq. Qurumdan sorğumuza cavab gözləyirik.
Gülnar Səlimova