Son zamanlar Kapital Bank haqqında şikayətlər durmadan artır.
Ednews xəbər verir ki, hazırda müştərilər bankın istər elektron, istərsə də nağd ödəniş xidmətlərində böyük problemlər yaşayır. Eyni zamanda “qaynar xətt”in iş keyfiyyətinin aşağı olması, müştərilərin suallarının cavabsız qalması isə başqa bir dərddir.
İstirahət günü isə müştərilərin əsəbləri daha da tarıma çəkilib. Belə ki, Kapital Bankın ATM-lərinin işləməməsinə görə yaşanan problemlər müştərilərin ciddi narazılıqlarına səbəb olub. Şikayətçilərin sözlərinə görə, heç bir marketdə, restoranda, ticarət mərkəzində Kapital bank kartı ilə ödəniş etmək mümkün olmayıb, həmçinin “Birbank” proqramında da problem yaşanıb.
Digər şikayətlər isə...
Kapital Bankın xidmətindən narazı olan müştərilərdən birinin sözlərinə görə, kartdan karta ödəniş edərkən onun balansından məbləğ çıxılsa da, əməliyyat uğursuzluqla nəticələnib. Banka müraciət edən müştəriyə isə bunun bank tərəfindən ancaq 3-4 günə araşdırılacağı bildirilib.
“Yolda pulsuz qalan qohumuma pul yolladım və əməliyyat uğursuz oldu. Bank isə bunu 4 gün müddətinə həll edib, məbləği balansıma geri qaytardı. Bu sistemin çox biabırçı vəziyyətdə çalışdığını göstərir. Şərt mənim balansıma qayıdacaq məbləğ deyildi, həmin an köməyə ehtiyacı olanın çarəsiz qalması idi”.
Bank isə...
Yaranan problemlə bağlı “Kapital Bank”dan verilən açıqlamada bildirilib ki, yaranmış problem sistemdə aparılan təkmilləşdirmə işləri ilə bağlıdır. Lakin sözügedən bankın xidmətindən yararlanan şəxslər bankda təkmilləşdirmə işlərinin görülməsinin artıq mütəmadi xarakter aldığını deyir.
Kapital Bank-ın İctimaiyyətlə Əlaqələr şöbəsinin rəisi Pərviz Sədrəddinov isə Ednews-a bildirib ki, ötən gün yaşanan problem bank sistemində aparılan təkmilləşdirmə işləri ilə bağlıdır.
“Kapital Bank-ın sistemində dünəndən etibarən texniki yenilənmələr və təkmilləşdirmə işləri aparıldığı üçün bəzi əməliyyatlarda müvəqqəti olaraq müəyyən məhdudiyyətlər yaranıb. Hazırda komandamız bunun üzərində işləyir və işlərin əsas hissəsi artıq həll olunub. Müştərilərimizdən bu halı anlayışla qarşılamağı xahiş edirik. Qısa zaman ərzində bütün məhdudiyyətlər tam olaraq aradan qaldırılacaq”, - deyə o, bildirib.
P. Sədrəddinov qeyd edib ki, təkmilləşdirmə işləri hər zaman aparılır.
“Təkmilləşdirmə işləri müəyyən zaman davam edə bilər. Bu 1 saat və ya 24 saat da çəkə bilər. Digər şikayətlərlə bağlı isə müştərilər fərdi şəkildə banka müraciət etsinlər”.
Qeyd edək ki, Londonda “Barclays Bank”da bankomatla bağlı texniki problem olarsa, bir müddət sonra buna görə müştəriyə kompensasiya ödənilir. Bu da insanların göstərilən xidmətdən razı qalmasına səbəb olur.
Nəzərə alsaq ki, Kapital Bank ölkə əhalisinin daha çox bank əməliyyatları icra etdiyi iki bankdan biridir, qurumun məsələyə daha ciddi şəkildə yanaşması daha yaxşı olardı.
Gülnar Səlimova
